विराटनगर । कोसी प्रदेशसभामा सांसदले बोलेको ‘राजा’ शब्दलाई रेकर्डबाट हटाइएको छ । आइतबार सदनको शुन्य समयमा बोल्ने सांसदहरु बीच पूर्वराजाले प्रजातन्त्र दिवसको अवसरमा दिएको शुभकामनालाई लिएर सवाल जवाफ भएको थियो ।
शुन्य समयमा बोल्दै राष्ट्रिय प्रजातन्त्र पार्टी (राप्रपा)की सांसद सबिना बजगाईंले केही नेताले राजालाई थुन्ने अभिव्यक्ति दिएको भन्दै असन्तुष्टि जनाइन् ।
उनले संसदमा भनिन्, “म घोर निन्दा र भत्र्सना गर्दछु । यी अभिव्यक्ति विदेशबाट आउने डलरको भरमा भएका हुन् । के हिम्मत छ ? राजालाई थुनेर देखाउने चुनौती दिन्छु ।”
सांसद बजगाईंले दिएको अभव्यिक्तिप्रति नेकपा एमाले कोसी संसदीय दलका प्रमुख सचेतक विदुरकुमार लिङ्थेपले नियमापत्ति जनाए ।
’डलर खानेहरू’ भनेर अप्रमाणित विषय सम्मानित सदनमा उठाएको भन्दै उनले प्रमाण भए सदनमा पेस गर्न भने ।
त्यसपछि सभामुख अम्बरबहादुर विष्टले बजगाईंलाई फेरि समय दिँदै प्रमाण पेस गर्न आग्रह गरेका थिए ।
सभामुखले दिएको थप समयमा सांसद बजगाईंले संघीयता, धर्म निरपेक्षता र गणतन्त्र लाद्न विदेशबाट डलर भित्रिएको कुरा सञ्चारमाध्यमबाट आएको र अमेरिकी राष्ट्रपतिबाट पनि यो कुरा सार्वजनिक भएको भन्दै गणतन्त्र खारेज गर्न माग गरिन ।
पुन ः एमाले प्रमुख सचेतक लिङ्थेपले संघीयता, धर्मनिरपेक्षता र गणतन्त्रको आधारमा बनेको सदनमा बसेर यही खारेज गर्नुपर्छ भनिएको विषय आपत्तिजनक भएको बताए ।
यस्तै सांसद बजगाईंले नै बोलेको ‘राजा’ शब्दमा नेकपा माओवादी सांसद गोम्बु शेर्पाले नियमापत्ति जनाए ।
शेर्पाले भने, “नेपालको संविधानले राजा नचिन्ने भएकोले यो राजा भन्ने शब्द रेकर्डबाट हटाउनुपर्छ ।”
उनले ‘राजा’ शब्द र ’डलर खानेहरू’ शब्द संसदको रेकर्डबाट हटाउन माग गरे । सांसदहरुबाट लगातार शब्द हटाउन दवाव आएपछि सभामुख विष्टले पुष्टि नहुने ’डलर खाएको कुरा’ र ’राजा’ भन्ने शब्द सभाको रेकर्डबाट हटाउन सचिवालयलाई निर्देशन दिए । त्यसपछि संसद सचिवालयले ’राजा’ र ’डलर खाएको कुरा’ शब्द संसदीय अभिलेखबाट हटाइयो ।
