विराटनगर । कोसी प्रदेशसभामा ‘प्रदेश जीवनाशक विषादी व्यवस्थापन गर्न बनेको विधेयक’ सर्वसम्मतिले पारित भएको छ ।
आइतबारको बैठकमा कोसी प्रदेश सरकारका उद्योग, कृषि तथा सहकारी मन्त्री खगेनसिं हाङ्गामले सो विधेयक पारित गरियोस् भनी गरिएको प्रस्तावलाई सभामुख अम्बरबहादुर विष्टले निर्णयार्थ प्रस्तुत गर्दा सर्वसम्मतिले पारित भएको हो ।
यस्तै , बैठकमा ‘प्रदेश वन ऐन, २०७७ लाई संशोधन गर्न बनेको विधेयक’ माथि सैद्धान्तिक छलफलमा उठेका विषयमा प्रदेशका पर्यटन, वन तथा वातावरणमन्त्री सदानन्द मण्डलले जवाफ दिए ।
उनले यो ऐनले स्वच्छ वातावरण बनाउन र मानव जीवनलाई स्वच्छ वातावरणमा लैजान मद्दत गर्ने बताए । उनले वनमा देखिएका समस्यालाई समाधान गर्न नै यो ऐनलाई संशोधन गरिएको प्रस्ट पार्दै पर्यापर्यटन, जलाशय, जलको मुहान, सिमसार क्षेत्रलाई संरक्षण संवद्र्धन गर्न सहयोग पुग्ने बताए ।
मन्त्री मण्डलले ‘कोशी प्रदेश प्रदेश वातावरण संरक्षण ऐन, २०७६ लाई संशोधन गर्न बनेको विधेयक’माथि विचार गरियोस् भनी गरिएको प्रस्ताव सर्वसम्मतिले पारित भई विधेयकमाथि सैद्धान्तिक छलफल सुरु भयो ।
सैद्धान्तिक छलफलमा प्रदेशसभा सदस्यहरु विनोद राई, किशोरचन्द्र दुलाल, शोभा चेम्जोङ, रामप्रसाद महतो र कमला दर्नालले आ–आफ्नो धारणा राखेका थिए ।
