विराटनगर । कोसी प्रदेश सरकारले आयोजना बैङ्क सञ्चालन गर्ने सम्बन्धी कार्यविधि स्वीकृत गरेको छ । मङ्गलवार साँझ बसेको कोसी प्रदेश सरकारको मन्त्री परिषद् बैठकले कोसी प्रदेश आयोजना बैङ्क व्यवस्थापन कार्यविधि २०८१ लाई स्वीकृत गरेको हो । कोसी प्रदेशमा बन्ने आयोजना बैङ्कलाई व्यवस्थित गर्नको लागि आयोजना बैङ्क सञ्चालन तथा व्यवस्थापन कार्यविधि तयार पारिएको सरकारले जनाएको छ । कोसी प्रदेश सरकारका प्रवक्ता एवम् आन्तरिक मामिला तथा कानुन मन्त्री रेवतीरमण भण्डारीले कार्यविधि स्वीकृत भएसँगै योजना तर्जुमा, योजना छनौट, योजनाको स्वीकृति सम्बन्धी सुशासनलाई व्यवस्थापन गर्ने कामको प्रारम्भ भएको बताए ।
बैठकले सुरक्षा निकायको भवन निर्माण गर्ने रकम बाँडफाँड समेत गर्ने निर्णय गरेको छ । ‘प्रदेश सरकारले विभिन्न सुरक्षा निकायका भवनहरू बनाइदिने सम्बन्धमा आवश्यक रकम विनियोजन गरिएको थियो, मन्त्री भण्डारीले भने, त्यसलाई बाँडफाँड गर्ने प्रस्ताव स्वीकृत भएको छ ।’
आगामी आर्थिक वर्ष २०८२।०८३ का लागि प्रदेश सरकारबाट कार्यान्वयन गरिने समपूरक र विशेष अनुदान अन्तरगतका आयोजनाहरू स्वीकृत गरी सङ्घीय योजना आयोगमा पठाउने निर्णय पनि गरेको छ । त्यस्तै सामाजिक सङ्घ संस्था दर्ता ऐन २०७५ लाई संशोधन गर्न बनेको विधेयकलाई सरकारको विषयगत समितिमा पठाउने र विषयगत समितिले तत्काल अध्ययन गरी सुझाव सहित मन्त्री परिषद्मा पेस गर्ने निर्णय भएको समेत उनले जानकारी दिए ।
