विराटनगर । नेकपा माओवादी केन्द्रका अध्यक्ष पुष्पकमल दाहाल प्रचण्डले पूर्वराजा ज्ञानेन्द्र शाहको भनाई प्रति आफूले कुनै महत्त्व नदिएको बताएका छन् ।
इतिहासबाट धेरै अघि बढि सकेको भन्दै अध्यक्ष प्रचण्डले पूर्वराजालाई कसैले बोल्न लगाएको हुन सक्ने बताए ।
‘ पूर्वराजा (ज्ञानेन्द्र शाह)लाई मैले कुनै महत्व दिएको छैन,’अध्यक्ष प्रचण्डले भने,’मानिसहरुले प्रतिक्रिया दिइरहेका छन् । किन भने इतिहासबाट धेरै अघि बढिसक्यो । उनलाई कसैले बोल्न लगाएका होलान् । जसले स्वार्थसिद्ध नजिक बसेर पाउँला भन्ठानेर अघि बढाएका होला । त्यसको केही अर्थ छैन । यो देशमा फेरि राजतन्त्र फर्किने भन्ने कुरा असंभव छ ।’
बुधबार प्रेस सेन्टर मोरङद्वारा विराटनगरमा आयोजित पत्रकार सम्मेलनमा अध्यक्ष दाहालले अभियानको बारेमा प्रष्ट पारेका थिए ।
पत्रकार सम्मेलनमा अध्यक्ष प्रचण्डले पार्टीभित्र आन्तरिक मनमुटाव केही नभएको बताए ।
जारी जनतासँग माओवादी जागरण अभियानको पहिलो दिन झापाको सभामा वरिष्ठ उपाध्यक्ष नारायणकाजी श्रेष्ठले बोल्ने समय कम पाएको भन्दै रिसाएर माइक नै छाडेर हिँडेका थिए ।
सो विषयमा टिकाटिप्पणी आएपछि अध्यक्ष प्रचण्डले पार्टीमा विवाद नरहेको दोहोर्याएका हुन । उनले पूर्वउपराष्ट्रपति नन्दबहादुर पुनलाई सक्रिय राजनीतिमा ल्याउनेबारे पनि पार्टीमा कुनै विवाद नरहेको दाबी गरे ।
अहिलेसम्म औपचारिक निर्णय नगरिसकेकाले अभियानमा नल्याएको उनको भनाई थियो ।
उनले भने, ‘उपराष्ट्रतिलाई सक्रिय राजनीतिमा ल्याउनेबारे हाम्रो पार्टीमा कुनै विवाद छैन। तर, प्रदेशमा पनि साथीहरूको राय सुझाव बुझेर मात्रै उहाँलाई औपचारिक जिम्मेवारी दिँदा ठिक हुन्छ भनेकाले उहाँलाई उपाध्यक्ष बनाउने हो कि ? सचिव, उपमहासचिव बनाउने भन्नेबारे निर्णय गरिनसकेकाले नल्याएका हौँ।’
