विराटनगर । विराटनगरको महेन्द्र मोरङ आदर्श बहुमुखी क्याम्पसमा नेविसङ्घका दुई समूह बिच झडप भएको छ। झडपमा परी दुई जना घाइते भएका छन् । क्याम्पसमा देउवा समूह र शेखर कोइराला समूहका विद्यार्थी बिच कुटाकुट भएको हो । घटनामा नेविसंघका मोरङ जिल्ला सभापति सरोज पोखरेल तथा अर्का सदस्य आयुष दाहाल घाइते भएका छन् । उनको नोबेल अस्पतालमा उपचार भइरहेको छ ।
आउँदै गरेको स्ववियु निर्वाचनको विषयलाई लिएर केही दिन अघि देखि नै यी दुई समूहको बिचमा विवाद हुँदै आएको थियो । बिहीबार बिहान स्ववियु निर्वाचनको भागबन्डा मिलाउने बारेमा आयोजना गरिएको छलफलको क्रममा हात हालाहाल भएको थियो । छलफल गर्न गएको बेलामा आफूमाथि हातपात भएको पोखरेलले बताए । स्ववियु सभापति जसवन्त पौडेल काँग्रेसको संस्थापन पक्षका हुन् उनकै नेतृत्वमा रहेको समुहहरु स्ववियु सचिव एलिश ठकुरी, प्रशान्त यादवलगायत समूहले आफूमाथि कुटपिट गरेको उनले बताए । प्रहरीले घटनाको विषयमा अनुसन्धान भइरहेको जनाएको छ । आक्रमण गर्ने समूह हातहतियार सहित कुटपिटमा उत्रिएको पाइएको प्रहरीले जनाएको छ ।
