विराटनगर । नेकपा एमाले मोरङको १० औ अधिवेशनको बन्द सत्र सुरु भएको छ । हिजोबाट सुरु भएको अधिवेशनमा ढिला गरी बन्द सत्र सुरु भएको हो । बन्द सत्रमा सङ्गठन कमिटीका अध्यक्ष बाबुराम कार्कीले प्रतिवेदन पेस गरेका छन् । बन्द सत्र सुरु भए पनि अधिवेशनमा निर्वाचनको चहल पहल सुरु भएको छ ।
सर्वसम्मत नेतृत्व चयन गर्न नेतृत्वले चर्को दबाब दिए पनि नेतृत्व चयन निर्वाचनबाटै हुने देखिएको छ । अध्यक्षका लागि राजकुमार ओझा र अजम्वर राईले भोट माग्न थालेका छन् ।
अध्यक्षमा दुई जना प्रतिस्पर्धी देखिएपछि पदाधिकारीमा समेत प्यानल वाइज प्रतिस्पर्धा हुने देखिएको छ । ओझा प्यानलबाट उपाध्यक्षमा शान्ति लिम्बु र सचिवमा रविन थापाले उम्मेदवारी दिने तयारी गरेका छन् । उप सचिवमा भने अहिले सम्म ओझा समूहबाट नाम फाइनल हुन सकेको छैन । ओझालाई स्थायी कमिटी सदस्यहरू शेरधन राई, हिक्मत कार्की, भानुभक्त ढकाल, एमाले प्रदेश अध्यक्ष घनश्याम खतिवडाले समर्थन गरेको देखिन्छ ।
संस्थापन पक्षबाटै बाबुराम कार्की पनि उम्मेदवार बन्ने आशामा छन् । तर उनको सम्भावना नरहेको एमाले श्रोतले जनाएको छ ।
राई समूहबाट भने उपाध्यक्षमा सागर थापा र सचिवमा सोम थापाले उम्मेदवारी दिने तयारी गरेका छन् ।
उनीहरू पनि प्रतिनिधिसँग मत माग्न थालेका छन् । उप सचिवमा भने सन्तोष वान्तवा र उषा झाले मनोनयन गर्ने तयारी गरेको एमाले श्रोतले जनाएको छ । राई समूहलाई विनोद ढकालको समूहका रूपमा हेरिएको छ । ढकाल एमाले प्रदेशको अध्यक्षमा पराजित भएसँगै असन्तुष्ट समूहको नेतृत्व गर्दै आएका छन् ।
कोशी प्रदेशका अरू १३ जिल्लामा अधिवेशन भइसके पनि मोरङमा भने अधिवेशन हुन सकेको थिएन । मोरङमा कमिटीले काम गरिरहेको थियो ।
कुनै बेला ओलीकै विश्वास पात्र रहेका ढकाल अहिले भने संस्थापन पक्षसँग रुष्ट छन् । उनको प्रभाव जिल्लामा बलियो रहेकाले निर्वाचन प्रतिस्पर्धात्मक हुने अनुमान रहेको छ।
जिल्लामा आफ्नो प्रभाव कायमै रहेको सन्देश दिन पनि ढकाल पक्ष जसरी पनि निर्वाचनमा जाने योजनामा छ । यद्यपि संस्थापन पक्ष निर्वाचन रोकेर सर्वसम्मत नेतृत्व चयनको कसरतमा रहेको छ । एमाले कोशी प्रदेशका अध्यक्ष घनश्याम खतिवडाले सर्वसम्मत नेतृत्व चयनको पहल भइरहेको बताँउ छन् । एमाले मोरङ जिल्ला अधिवेशनमा ९१४ जना प्रतिनिधि छन् ।
