विराटनगर । कोसी प्रदेश सभाका सदस्यहरूले समयमै सभा सञ्चालन गर्न माग गरेका छन् । मङ्गलवार प्रदेश सभाको शून्य समयमा बोल्दै प्रदेश सभा सदस्य गणेश उप्रेतीले समयमै सभा सञ्चालन नहुँदा सदस्यहरू बेरोजगार भएर बस्नुपर्ने अवस्था आएको बताउनु भयो । समयमै सभा सञ्चालन गर्न नसक्दा यसको गरिमा घट्दै गएको उप्रेतीको तर्क छ ।
कोसी प्रदेश किन र कसको कारणले प्रदेश सभाको बैठक समयमा सुरु गर्न समस्या भएको हो त्यसमा सभामुख गम्भीर हुनुपर्ने उप्रेतीले बताउनुभयो । अर्का प्रदेश सभा सदस्य गाेम्बु शेर्पाले सरकारले पर्यटन वर्ष घोषणा गरे पनि सरकारले त्यसको तयारी नगरेको बताउनु भयो। पर्यटन मार्गको विकास र बिस्तार गर्नुपर्ने, नयाँ पर्यटकीय गन्तव्य पहिचान गर्नुपर्ने , पदमार्ग निर्माणका लागि नयाँ गन्तव्यको पहिचान गर्नुपर्ने जस्तो पर्यटन वर्षको तयारीमा सरकारले चासो नदेखाएको शेर्पाको भनाइ छ ।
पर्यटन वर्ष घोषणा गरेर त्यसको तयारी नगरी सरकार सभा र गोष्ठीमा मात्र सीमित भएको शेर्पाले बताउनुभयो । प्रदेश सभा सदस्य यशोदा कायस्थले धरानका जनताले आधारभूत स्वास्थ्य सेवा पाउन नसकेको बताउँदै धरानमा नगर अस्पताल सञ्चालन गर्न सरकार सँग माग गर्नुभयो ।
प्रदेश सभा सदस्य इस्राइल मन्सुरीले भोक्राहा नरसिंह गाउँ पालिका वडा नम्बर छमा फागुन १८ गते विद्युत सर्ट भई आगलागी हुँदा छ घार जलेर नष्ट भएको भन्दै उनीहरूलाई राहत दिन माग गर्नु भयो । आगलागीमा गरिब छ घरमा भएको अन्नपात, लत्ताकपडा, भाडा वर्तन लगायतका सबै सामाग्री जलेर नष्ट भएकाले उनीहरूलाई राहत दिनुपर्ने प्रदेश सभा सदस्य मन्सुरीको भनाइ छ ।
अर्का प्रदेश सभा सदस्य राजन किराँतीले केही दिन अघि आएको असिना पानीले चौदण्डी गढी नगरपालिकामा पाँच दर्जन भन्दा बढी घरको छानो दुलो पारेको जानकारी दिँदै उनीहरू छानो फेर्ने अवस्थामा नभएकोले छानो छाउने व्यवस्था गर्न माग गर्नु भयो ।
