विराटनगर । कोसी प्रदेश सभाका सदस्य गणेश उप्रेतीले प्रदेश सभा ढिलो सञ्चालन गरेर प्रदेश सांसदलाई २ घण्टासम्म बेरोजगार बनाएको आरोप लगाएका छन् । मङ्गलवारको कोसी प्रदेश सभाको शून्य समयमा बोल्दै उप्रेतीले सांसद आएर २ घण्टासम्म गफ लगाएर बस्नु परेको बताए । १२ बजे संसद् डाकियो २ बजे मात्रै संसद् सुरु भएको भन्दै सभामुखको ध्यानाकर्षण गराए ।
संसद् भित्र रहेका केही विषयहरू आए भनेँ, संसद् सञ्चालनका लागि सभामुखले २ घण्टा समय लिन सकिने भए पनि समयको मर्यादालाई ख्याल नगरिएको आरोप उनको थियो । उनले भने, ‘कुनै मन्त्रीलाई पर्खिनु पर्ने भयो भनेँ, कुनै सत्तारुढ दलका सांसदलाई पर्खिनु पर्ने भयो भनेँ अनि हामी सारा सांसदहरू कामै नपाएर बेरोजगार भएर यहाँनेर गफ गर्नको लागि, यहाँ चिया खानको लागि त आएको हैन नि ।’ उप्रेतीले समयको अनुशासनलाई कायम राख्न आग्रह गरे । ‘हामीले समाजलाई अनुशासन र मर्यादा सिकाउने अनि हामी आफैँ अनुशासन हीनता र मर्यादा विपरीत गई रहेका छौँ यस विषयमा मेरो गम्भीर आपत्ति छ ।’ समयमै संसद् चल्नु पर्नेमा नचलाई कुनै राजा महाराजालाई पर्खिएर बस्नु परेको भन्दै उनले आक्रोश व्यक्त गरे ।
समयमा नै सदन चल्नु पर्ने विषयमा चर्को आवाज उठाएका उप्रेतीले संसदीय समितिका बैठकहरू सदन नचलेको बेला राख्न समेत आग्रह गरे । ‘तारे होटलमा समितिका बैठकहरू राख्ने अनि बाँकी सांसदहरूलाई उभ्याएर बेरोजगार बनाएर राख्नु भएन, उप्रेती भन्छन्, कोसी प्रदेश सभाले गलत परम्परा बसाउन खोजेको छ, यसलाई अन्त्य गरेर लग्नुपर्दछ ।’ संसद् संचालनकोलागि ढिला हुन्छ भनेँ सबै सांसदहरूलाई कारण सहित एसएमएस गरी सूचना दिने प्रावधानको व्यवस्था गर्न माग गरे ।
‘सरकारले त जनताको कुरा सुनेन सुनेन सभामुख महोदय, उनले भने, प्रदेश सांसदले प्रदेश सभाको हुर्मत काढ्ने काम गरी प्रदेश सभाको गरिमालाई घटाउने काम नगरोस् ।’ प्रदेश सांसद र सरकारप्रति मानिसको वितृष्णा पैदा भइरहेको अवस्थामा सांसदहरू भत्ता पकाउनको लागि कसैलाई दुई दुई घण्टा पर्खिनु पर्ने विधि गलत भएको भन्दै गम्भीरता पूर्वक सच्याउन माग गरे । उनले प्रदेश सांसदहरू मर्यादित नभएको भन्ने खालको सन्देश दिएको थियो ।
प्रदेश सभाभित्र मर्यादाको कुरा गरेका उप्रेती आइतबारको प्रदेश सभा बैठकमा टिसर्ट लगाएर प्रदेशसभामा उपस्थित भएका थिए । कोसी प्रदेश सभाले आफ्नै पोसाक बनाएको छ । मङ्गलवार राष्ट्रिय सभाको विकास आर्थिक मामिला तथा सुशासन समितिले विराटनगरको रत्ना होटलमा कार्यक्रमको आयोजना गरेको थियो । राष्ट्रिय सदाचार नीति, दिगो विकास लक्ष्य र सङ्कल्प प्रस्ताव सम्बन्धमा अन्तरक्रिया कार्यक्रममा कोसी प्रदेश सभाको तीन वटा विषयगत समितिहरूलाई बोलाइएको थियो ।
सुशासन तथा योजना समिति, अर्थ समिति र सामाजिक विकास समितिका सभापति सहितका प्रदेश सभा सदस्यलाई छलफलमा सहभागी भएका थिए । उप्रेतीले यिनै प्रदेश सभाका समितिका सांसदहरूलाई लक्षित गरी प्रदेश सभाको हुर्मत काढ्ने काम गरेको आरोप लगाएका थिए ।
सांसद उप्रेतीको यो अभिव्यक्तिलाई सांसदहरूले विषयको गाम्भीर्य नै नबुझी बोलेको बताएका छन् । प्रदेश सभाको अर्थ समितिका सभापति विनोद राईसँग यस बारेमा नेपाल खबरले जानकारी लिँदा उनले भने, ‘माननीय गणेश उप्रेतीले सांसदहरूलाई लाञ्छित गर्नुको औचित्य छैन ।’ विधिको कुरा गर्नु ठिकै भए पनि राष्ट्रिय सभाको विषयगत समितिले आयोजना गरेको कार्यक्रममा प्रदेश सभाको सभापति तथा सांसद गएको विषयलाई गलत प्रचार गर्न खोजिएको बताए । नेकपा एमाले संसदीय दलका प्रमुख सचेतक विदुर लिङ्थेपले राष्ट्रिय सभाको सभापतिको आग्रहमा केही ढिला हुन गएको स्वीकार गरे । विधि अनुसार बोलाइएको समय भन्दा ढिला भएको हैन, केही समय ढिलो गरी मात्रै प्रदेश सभा सुरु भएको उनको भनाई छ । प्रदेश सभाका सांसदहरूलाई नै गलत आक्षेप लगाउने गरी त्यस्ता खालको अभिव्यक्ति अशोभनीय भएको टिप्पणी गरे ।
शून्य समयमा विपद्का कुरा
प्रदेश सभाका सदस्य राजन किराँतीले फागुन ११ गते साँझ उदयपुरको चौदण्डी गढीमा भीषण परेको असिना पानीले ७० घरमा क्षति पुर्याएको बताए । चौदण्डी गढी वडा नम्बर २ र ७ का ७० घरका छाना क्षतविक्षत अवस्थामा पुगेको बताए । उनले प्रदेश सरकारसँग गरिब तथा विपन्नलाई टिनको व्यवस्था गरिदिन आग्रह गरे । गम्बु शेर्पाले सरकारले पर्यटन वर्ष बनाउने घोषणा गरेको भए पनि तयारी नगरेको बताए । ‘पर्यटन वा भ्रमण वर्ष घोषणा गरेर मात्रै हुँदैन, उनले भने, तामझाम गरेर मात्रै पर्यटन प्रवर्द्धन नहुने भन्दै पर्यटन पूर्वाधार निर्माण गर्नु जरुरी छ ।’ पर्यटन वर्ष मनाउने हो भनेँ कसरी तयारी भइरहेको छ त्यसको जानकारी गराउन सरकारसँग जवाफ माग गरे । पर्यटकीय गन्तव्य भनेको सोलुखुम्बु र सगरमाथा भएकोले विराटनगरदेखि सोलुसम्मको सहज यातायातको व्यवस्था गर्न माग गरे । सुनसरीका सांसद इस्राइल मन्सुरीले भोक्राहा नर्सिङमा फागुन १८ गते विद्युत् सर्ट भई भएको आगलागीबाट ६ घर पूर्ण रूपमा जलेर नष्ट भएकोले तत्काल राहत उपलब्ध गराउन सरकारसँग माग गरे ।
भोजपुरका सांसद विनोद बान्तवाले सुख्खा मौसम सुरु भएकोले डढेलो लाग्न थालेको भन्दै अहिले देखि नै सचेतना जगाउन सक्नु पर्ने उल्लेख गरे । गत वर्ष पनि धेरै घरहरू आगलागीबाट नष्ट भएको सुनाउँदै यस बारेमा नागरिकलाई सुसूचित गराउन सरकारले ध्यान दिनु पर्ने बताए । बर्खा लागे पछि तराईबाट पहाडमा सामान ढुवानी गरेर लग्न समस्या हुने भएकाले बाटोघाटोको राम्रो भएकै अवस्थामा निर्माण सामाग्री ढुवानी गर्ने सरकारले समन्वय गर्नु पर्नेमा जोड दिए ।
सुनसरीकी सांसद यशोदा कायस्थले धरान उपमहानगरपालिकामा आधारभूत निःशुल्क स्वास्थ्य सेवा समेत पाउन नसकेको बताइन् । उनले धरान उपमहानगरपालिका भित्र एउटा नगर अस्पताल समेत नभएको जानकारी गराइन् । बिपी कोइराला स्वास्थ्य प्रतिष्ठानमा नागरिकले सहज सेवा पाउन नसकेको तथा असाध्यै महँगो रहेको समेत बताइन् ।
