सनुसरी । सुनसरीको धरानमा प्रहरीले गोली हानेर गाँजा बरामत गरेको छ । प्रहरीले धरानको जंगलमा गोली प्रहार गरी २ सय ३० केजी गाँजा नियन्त्रणमा लिएको सुनसरी प्रहरीले जानकारी दिएको छ । गाँजा तस्कर गर्ने समुहका एक व्यक्तिलाई पनि प्रहरीले नियन्त्रणमा लिएको छ ।
धनकुटाको सागुरीगडी गाउँपालिका बाट धरानतर्फ गाँजा बोकेर आउँदै गरेको समुहलाई नियन्त्रणमा लिन प्रहरीले गोली गर्नुपरेको प्रहरीले जनाएको छ । तस्करी गर्ने समुहले प्रहरी माथी आक्रमणको प्रयास गरेपछि प्रहरीले प्रतिरक्षा गर्दै गोली प्रहार गरेको प्रहरीको भनाई छ ।
गाँजा तस्करीमा ९ जनाको समुह रहेका थिए । गोली प्रहार गरेपछि उनीहरु गाँजा छाडेर भागेको प्रहरीले जनाएको छ । सो क्रममा प्रहरीले गाँजा तस्करी गर्ने धनकुटा साँगुरीगडी–९ का ४३ वर्षीय हरिकुमार राइलाई पक्राउ गरेको सुनसरीका प्रहरी प्रमुख प्रहरी उपरिक्षक सुमन कुमार तिम्सिनाले जानकारी दिए ।
अन्य आठ जनाको खोजी भइरहेको प्रहरीले जनाएको छ । प्रहरीले राजमार्गहरुमा कडा चेकजाँच गर्न थालेपछि पछिल्लो समय तस्करहरुले गाँजा तस्करीका लागि जंगलको बाटो प्रयोग गर्न थालेको प्रहरीको भनाई छ ।
