विराटनगर । रानी विराटनगर धरान छ लेन सडक विस्तार आयोजना अन्र्तगत दुहबी बजारमा सडक क्षेत्र भित्र परेका घरहरु डोजर लगाएर भत्काइएको छ ।
बिहिबार सडक क्षेत्र भित्र परेका करिव ५० घरहरु डोजर लगाएर भत्काइएको हो । विगत लामो समय देखी दुहबी बजार क्षेत्रमा सडक क्षेत्र भित्र भएका घरहरु स्थानियले भत्काउन अटेर गर्दै आएका थिए ।
तर एक महिना अघि सर्वोच्च अदालतले स्थानीयहरूद्वारा दायर गरिएको रिट निवेदन खारेज गरेको थियो । मुद्दाको टंगो लागेपछि सडक विभागले ३० दिन भित्र अतिक्रमित संरचना हटाउन सूचना जारी गरेको थियो । मुद्दा हारेपछि भने दुहबी बजारका घरधनीहरुले विस्तारै घर भत्काउन सुरु गरेका थिए ।
तर सडक विभागले जारी गरेको ३० दिनको सूचनाको म्याद सकिदा सम्म घर नभत्काएपछि भने बिहिबार डोजर लगाएरै घरहरु भत्काइएको हो ।
दुहबी नगरपालिकाले सडक विभागको समन्वयमा, बजार क्षेत्रको ६३० मिटर बिल्ट अप एरिया भित्र पर्ने संरचनाहरू हटाउने अभियान चलाएको हो । सडकको दायाँबायाँ ६–६ मिटर सेटब्याक कायम गर्नका लागि ७ वटा स्काभेटरको प्रयोग गरिएको छ ।
सर्वोच्च अदालतले स्थानीयहरूको रिट निवेदन खारेज गरेको र सडक विभागले ३० दिनभित्र अतिक्रमित संरचना हटाउन दिएको समय भित्र घर भत्काउन अटेर गरेपछि डोजर लगाएर घर भत्काइएको दुहबी नगरपालिकाका नगरप्रमुख वेदनारायण गच्छदारले जानकारी दिए ।
धेरै स्थानीयले आफैं घर भत्काए पनि, केहीले अटेर गरेकाले बाध्य भएर बल प्रयोग गर्नुपरेको नगरप्रमुख गच्छदारले बताए ।
डोजर चल्न थालेपछि केही स्थानीयले अवरोध सिर्जना गरेपछि ठुलो संख्यामा प्रहरी परिचालन गरिएको थियो ।
