सुनसरी । इटहरीमा अन्तर्राष्ट्रिय नाट्य महोत्सव सुरु भएको छ । एसियन पिपुल्स थिएटर फेस्टिभल सोसाइटीद्वारा सर्वनाम थिएटरको सहकार्यमा कोसी प्रदेशको पर्यटन वर्ष–२०८१ को अवसरमा अन्तर्राष्ट्रिय नाट्य महोत्सव सुरु भएको हो ।
इटहरी म्याट्रिक्स परिसरभित्र रहेको सांस्कृतिक भवन थिएटरमा शुक्रवार सुरु महोत्सवमा १३ मुलुकका २० वटा नाट्य संस्थाका ४४ जना विदेशी रङ्गकर्मी र संस्कृतिकर्मी कलाकारको सहभागिता रहेको छ । एसियन पिपुल्स थिएटर फेस्टिभल सोसाइटी, हङकङ र सर्वनाम थिएटर काठमाडौँको सहकार्यमा सुरु नाट्य महोत्सवको स्थानीय मूल संयोजन इटहरी म्याट्रिक्स र आरम्भ नाट्य डबलीले गरेको हो ।
तीन दिनसम्म चल्ने महोत्सवमा विविध नाटक प्रदर्शन, कार्यशालाहरुका साथै सांस्कृतिक आदानप्रदान गरिने कार्यक्रम रहेको छ । नाट्य महोत्सवले नेपाल र कोसी प्रदेशको पर्यटन प्रवर्द्धन, अन्तर्राष्ट्रिय सम्बन्ध विस्तार तथा कला, संस्कृति र सभ्यताको अभिवृद्धिमा महत्त्वपूर्ण योगदान पुर्याउने विश्वास लिइएको आयोजकको भनाइ छ ।
महोत्सवको कोसी प्रदेशका मुख्यमन्त्री हिक्मत कुमार कार्कीले उद्घाटन गरेका छन् ।
