सुनसरी । निर्देशक दीपक रौनियारले निर्देशन गरेको चलचित्र ‘राजागञ्ज’ लाई दर्शकहरूले मन पराएका छन् ।
चैत्र १ गतेबाट देशका सम्पूर्ण फिल्म हलमा प्रदर्शन हुने चलचित्र ‘राजागञ्ज’ शुक्रवार कलालय इटहरीको समन्वयमा इटहरीको इलाईट हलमा ‘विशेष सो’ आयोजना गरी देखाइएको थियो । मधेसको राजनीति र सामाजिक विषयवस्तुलाई लिएर निर्माण गरिएको चलचित्रलाई दर्शकहरूले राम्रो फिल्म भन्दै प्रशंसा गरेका छन् ।
‘पूजा सर’को नाममा अन्तर्राष्ट्रिय फिल्म फेस्टिभलहरूमा सहभागिता जनाइसकेको यो चलचित्रलाई राम्रो प्रतिक्रिया प्राप्त भएको थियो । अन्तर्राष्ट्रिय क्षेत्रमा सकारात्मक प्रतिक्रियाबाट उत्साहित बनेको निर्माण टिमले प्रदर्शन अघि नै ‘विशेष सो’ आयोजना गरी दर्शकको प्रतिक्रिया लिएको हो ।
‘विशेष सो’ पछि चलचित्र हेरेका दर्शकहरूसँग निर्माण टिमले संक्षिप्त अन्तर्क्रिया गर्दै प्रतिक्रिया लिएको थियो । जसमा दर्शकहरूले चलचित्र राम्रो बनेको भन्दै निर्माण टिमलाई बधाई दिए । अधिकांश दर्शकहरूले धेरै समय पछि सामाजिक विषयवस्तुमा अन्तर्राष्ट्रिय स्तरको चलचित्र निर्माण भएको बताए ।
दर्शकहरूले चलचित्रको मुख्य पात्र ‘पूजा सर’को अभिनयलाई मन पराएका छन् । महिला पात्र ‘पूजा सर’ले नै सम्पूर्ण चलचित्रलाई डोर्याएकी छिन् । ‘पूजा सर’को भूमिका आशा मग्रातीले गरेकी छिन् ।
चलचित्र हेरेपछि भुुषिता बशिष्ठले महिलालाई सधैँ रोनाधोना र आमाको भूमिकामा मात्रै देखाउने गरिएको तर यो फिल्ममा भने निकै प्रभावशाली र कठिन रोलमा महिला पात्रलाई सफल रूपमा प्रस्तुत गरिएको भन्दै निर्देशक रौनियारलाई बधाई दिइन ।
तरहराका वसन्त घिमिरे चलचित्र राम्रो बनेको बताए । उनले चलचित्रको दोस्रो सिक्वेल बन्न सक्ने वा पूजा सरको भूमिकालाई लिएर अरू कुनै चलचित्र निर्माण गर्ने बारे निर्देशक रौनियारसँग जिज्ञासा राखेका थिए ।
कलाकारहरू दयाहाङ राई र विजय बरालको अभियानलाई पनि दर्शकहरूले मन पराए । नायिका ऋचा शर्माको नेगेटिभ रोल र मिस नेपाल समेत रहेकी निकिता चण्डकको अभियानलाई पनि दर्शकहरूले रुचाएका छन् ।
दर्शकहरूले राखेका जिज्ञासामा निर्देशक रौनियारले जवाफ दिँदै चलचित्रलाई राम्रो बनाउन आफ्नो तर्फबाट सबै मेहनत लगाएको बताए ।
यो चलचित्रले मधेसको राजनीतिक र सामाजिक विषयलाई प्रस्तुत गरेको छ । विशेष गरी मधेसी समुदायलाई पहाडी समुदायले गर्ने व्यवहार र त्यसको असर कति गहिरो सम्म परेको छ भन्ने कुरालाई देखाउन चलचित्र सफल रहेको छ ।
लामो समय चलेको मधेस आन्दोलन र त्यसको प्रभावलाई संक्षिप्त रूपमा प्रभावकारी ढङ्गले देखाइएको छ ।
चलचित्र दुई ‘पहाडीया बच्चाहरू’ (चलचित्रमा प्रयोग भएको भाषा) को अपहरणको अनुसन्धानमा केन्द्रित छ । अपहरणमा परेका दुई बच्चाहरूको उद्धार गर्न ‘पूजा सर’ ले गरेको अनुसन्धानलाई निकै रोचक ढङ्गले प्रस्तुत गरिएको छ । नेपाल प्रहरीको अनुसन्धान कसरी हुन्छ र कहाँ सम्म जान सक्छ भन्ने विषयलाई आम दर्शकले बुझ्ने गरी देखाउन चलचित्र सफल छ ।
चलचित्रमा ‘अपहरण’ को कनेक्सन प्रधानमन्त्री सम्म पुग्छ ।
‘सय वटा कुहिएको आँपभन्दा एउटा असल आँपको मूल्य बढी हुन्छ, तपाईँ आफैँ हिसाब लगाउनुस्, नत्र बच्चाको ज्यान जान सक्छ ।’ अपहरणकारीले फिरौतीका लागि पठाएको यो सन्देश निकै इन्ट्रेस्टिङ छ ।
यो दृश्यसँगै साइडमा प्रधानमन्त्री केपी शर्मा ओलीले संविधान जारी भएपछि गरेको भाषण पनि देखाइन्छ । अपहरणकारीको सन्देश र प्रधानमन्त्रीको भाषणको कनेक्सन बुझन एक पटक हलमा पुगेर चलचित्र हेर्नै पर्ने हुन्छ ।
यो विषय चलचित्र प्रदर्शनमा आएपछि विवादमा पनि पर्न सक्छ । यो दृश्य सेन्सर बोर्डबाट पास गराउन निर्देशक रौनियारलाई चुनौती पनि उत्तिकै छ ।
समग्रमा फिल्म राम्रो बनेको छ । अन्तर्राष्ट्रिय क्षेत्रमा राम्रो प्रतिक्रिया पाएको चलचित्रलाई नेपाली आम दर्शकले कसरी लिने हुने त्यो भने प्रदर्शनमा आए पछि नै भन्न सकिन्छ । चलचित्र चैत्र १ गतेबाट देशका सम्पूर्ण फिल्म हलमा प्रदर्शन हुँदै छ ।
