सुनसरी । सुनसरीको धरानमा रहेको पिण्डेश्वर विद्यापीठ स्ववियु निर्वाचनमा सभापति सहित सबै पदमा निर्विरोध निर्वाचित भएका छन् । स्ववियु सभापतिमा अनेरास्ववियुका सुधाकर पोख्रेल निर्विरोध निर्वाचित भएका छन् ।
पिण्डेश्वरमा अनेरास्ववियु, नेपाल विद्यार्थी संघ र राष्ट्रिय प्रजातान्त्रिक विद्यार्थी संगठन नेपालले गठबन्धन गरेका थिए । गठबन्धनको तर्फबाट साझा उम्मेद्वारी दिएपछि निर्विरोध निर्वाचित भएका हुन ।
पिण्डेश्वरको चुनावी कार्यक्रम अनुसार चैत १० गते हुने चुनावका लागि सोमबार उम्मेदवारी मनोनयन पत्र दर्ता भएको थियो । सो उम्मेद्वारी तर्फ कुनै दावी विरोध नपरेपछि निर्विरोध भएका हुन ।
उम्मेदवारी दर्तामा सभापति सहित स्ववियु कार्यसमितिका सबै पदमा १/१ जनाको मात्र उम्मेदवारी परेपछि कार्यसमिति नै निर्विरोध भएको निर्वाचन समिति संयोजक डा.कृष्ण गोपाल अधिकारीले जानकारी दिए ।
निर्वाचित कार्यसमितिको सचिवमा नेविसंघका प्रवेश पौडेल, कोषाध्यक्षमा अनेरास्ववियुका विवेक गुरागाईँ रहेका छन् ।
प्रत्यक्ष तर्फका सदस्यहरूमा नेविसंघका छविन्द्र भट्टराई, विजय निरौला, राष्ट्रिय प्रजातान्त्रिक विद्यार्थी सङ्गठन नेपालका दिगन्त प्रसाद घिमिरे, आशिष नेपाल छन् ।
समानुपातिक तर्फ अनेरास्ववियुका अर्जुन निरौला, नेविसंघका गोविन्द अधिकारी, अरुण नेपाल, राष्ट्रिय प्रजातान्त्रिक विद्यार्थी सङ्गठन नेपालका गोपाल गुरागाईँ छन् ।
निर्विरोध निर्वाचित कार्यसमितिमा प्रत्यक्ष तर्फ ७ र समानुपातिक तर्फ ४ गरी ११ जना रहेका छन् ।
पिण्डेश्वर विद्यापीठ नेपाल संस्कृत विश्वविद्यालयको आङ्गिक क्याम्पस हो ।
