विराटनगर । राष्ट्रिय स्वतन्त्र पार्टी (रास्वपा)ले सुनसरी सभापति जीवनकुमार श्रेष्ठलाई स्पष्टीकरण सोधेको छ ।
जिल्ला सभापति श्रेष्ठले रास्वपा पार्टी नभई कम्पनी हो भनी अभिव्यक्ति दिएको भन्दै रास्वपाको कोशी प्रदेश समितिका कार्यवाहक सभापति गोमा तामाङ(शरिन)ले स्पष्टीकरण सोधेकी हुन ।
पार्टीको नीति, उद्देश्य र कार्यक्रम विपरीत पार्टी सदस्यलाई नैरस्यता बढाउने गतिविधिमा लाग्नुभएकाले यहाँलाई पार्टीले जिल्ला सभापति नरहने गरी कारबाही किन नगर्ने ? भनी सभापति श्रेष्ठलाई स्पष्टीकरण सोधिएको छ । सो को जवाफ २४ घन्टाभित्र दिन भनिएको छ । समय सीमाभित्र स्पष्टीकरण प्राप्त नभएमा पार्टी गतिविधि विपरीत लागेको स्वीकारेको ठानी पार्टी विधान बमोजिम कार्बाही गर्ने स्पष्टीकरणमा उल्लेख छ ।
श्रेष्ठलाई सोधिएको स्पष्टीकरणमा भनिएको छ, ‘चैत ३ गते कोशी प्रदेशको आधिकारिक वाट्सएप ग्रुपमा प्रदेश समिति सदस्य धनेश्वर शाहको ‘४ गतेको बैठक ८ गते सरेको हो ? भन्ने जिज्ञासामा तपाईंले ‘यहाँ जे पनि हुनसक्छ । यो कम्पनी हो पार्टी हैन’ भन्ने अभिव्यक्ति दिई पार्टी प्रति दिग्भ्रमित पार्ने काममा अग्रसर भएको देखिन्छ,’
‘ तपाईको यो भनाई म प्रति अथवा कोशी प्रदेशप्रति होइन भने यो केन्द्रलाई लगाएको आरोप हो । पार्टीलाई लगाएको आरोप लान्छना क्षम्य हुने देखिँदैन ।’ का.वा. प्रदेश सभापति शरिनले स्पष्टीकरणमा भनेकी छिन् ।
का.वा. सभापति शरिनले आफु प्रदेशको नेतृत्वमा आएपछि विगतको नेतृत्वले लथालिंङ्ग बनाएको संगठनलाई सहि रुपमा ल्याएर पार्टीलाई उर्जाशिल बनाएको दावी गरेकी छिन् । उनले उदयपुर र विराटनगर महानगरपालिकाको पार्टी संगठनलाई विधिवत तवरले निर्माण गरिएको भन्दै आफ्नो नेतृत्व वा पार्टी कसरी कम्पनी भयो ? भन्दै प्रश्न गरेकी छिन् ।
उनले जिल्ला सभापति श्रेष्ठले यस अघि पनि फेसबुकमै राजिनामा दिँदै असक्षमता प्रकट गरेको आरोप समेत लगाएकी छिन् ।
