विराटनगर । पूर्वप्रधानमन्त्री तथा नेपाल समाजवादी पार्टीका अध्यक्ष डा.बाबुराम भट्टराईलाई कोशी प्रदेशका मुख्यमन्त्री हिक्मत कुमार कार्कीले प्रदेशको नाम ‘कोशी’ हो भन्दै सिकाएका छन् ।
डा. भट्टराईले सामाजिक सञ्जाल फेसबुकमा स्टाटस लेख्ने क्रममा ‘प्रदेश १’ लेखेपछि मुख्यमन्त्री कार्कीले भट्टराईको पोष्टमा कमेन्ट लेख्दै प्रदेशको नाम ‘कोशी हो है’ भन्दै सिकाएका हुन ।
डा. भट्टराईले विहिबार सामाजिक सञ्जाल फेसबुकमा स्टाटस लेखेका छन् । खासमा उनी अहिले सुनसरीको झुम्कामा पार्टीको अभिमुखिकरण कार्यक्रममा सहभागी हुन आएका छन् ।
सोही कार्यक्रम बारे जानकारी दिन उनले फेसबुकमा स्टाटस लेखे,‘ प्रदेश १ को अभिमुखीकरण कार्यक्रमको सिलसिलामा सुनसरी झुम्कामा रङ्गीचङ्गी भेषभूषामा सजिएका थारू सांस्कृतिककर्मीहरूका साथ ।’
डा. भट्टराईले ‘प्रदेश १ ’ लेखेको विषयमा असन्तुष्टि जनाउँदै मुख्यमन्त्री कार्कीले पोष्ट भित्र प्रवेश गरी कमेन्ट गर्दै प्रदेशको नाम कोशी भएको जानकारी दिए ।
डा. भट्टराईको पोष्टमा मुख्यमन्त्री कार्कीले कमेन्टमा, ‘आदरणीय डाक्टर साब नमस्कार। कहाँ छ हजुर प्रदेश १ ? यो प्रदेशको नाम कोशी हो है ।’
मुख्यमन्त्री कार्कीले कमेन्ट गरेपछि अरुले पनि कमेन्ट लेखेका छन् ।
गाली पाईन्छ भन्दा भन्दै किन पोष्ट गर्नु, कोशी भएको थाहा छैन भन्दै अन्य व्यक्तिहरुले कमेन्टमा लेखेका छन् ।
२०७९ फागुन १६ गते तत्कालीन प्रदेश १ को नाम कोशी पारित भएको थियो । तर डा.भट्टराईले अहिले पनि प्रदेशको नाम कोशी नलेखेर ‘प्रदेश १’ नै लेख्दा मुख्यमन्त्री कार्कीले ‘यो प्रदेशको नाम कोशी हो है’ भनेर सिकाएका हुन ।
प्रदेशको नाम कोशी राखेपछि पहिचान पक्षधरहरुले असन्तुष्टि जनाउँदै आन्दोलन गर्दै आएका छन् ।
पहिचान पक्षधरहरूले तत्कालीन प्रदेश १ को नाम पहिचानकै आधारमा राखिनुपर्ने माग राख्दै आएका छन ।
