विराटनगर । प्रेस चौतारी नेपालको १० औं महाधिवेशन आज(आइतबार)बाट मोरङको विराटनगरमा सुरु हुँदैछ । 

तीन दिन सम्म चल्ने महाधिवेशनको उद्घाटन नेकपा एमालेका महासचिव शंखर पोखरेलले गर्ने भएका छन् । 

यस अघि महाधिवेशनको उद्घाटन प्रधामन्त्री एवंम नेकपा एमालेका अध्यक्ष केपी शर्मा ओलीले गर्ने भनिएको थियो । अध्यक्ष ओली नआउने भएपछि महासचिव पोखरेलले उद्घाटन गर्ने  प्रेस चौतारीले जनाएको छ । 

महाधिवेशनमा सहभागि हुन देशभरका चौतारीमा आवद्ध ९ सय प्रतिनिधि विराटनगर आइपुगेका छन् । 

महाधिवेशनले नयाँ नेतृत्व चयन गर्नेछ । आगामी नेतृत्वका लागि वर्तमान उपाध्यक्ष द्धय गणेश पाण्डे र राजेश राईले उम्मेद्वारी घोषणा गरेका छन् । 

यस अघि पाण्डेलाई एमालेले गत फागुन २८ गते पार्टीको केन्द्रीय प्रचार तथा प्रकाशन विभागको सचिव बनाएको थियो । तर उनले चैत्र ८ गते सो पदबाट राजिनामा गर्दै चौतारीको अध्यक्षको उम्मेद्वारी घोषणा गरेका थिए । अध्यक्षमा उठ्ने भएपछि दोहोरो जिम्मेवारीमा नरहने भन्दै उपाध्यक्ष पाण्डेले राजिनामा दिएको बताएका थिए । 

यस अघिबाटै उपाध्यक्ष राजेश राईले अध्यक्षको दावेदारी दिँदै आएका थिए । उपाध्यक्ष राईले चुनावी प्रतिस्पर्धा गर्दै नेतृत्व चयन गर्नुपर्ने माग राख्दै आएका छन् ।