सुनसरी । कोशी प्रदेशमा सार्वजनिक सवारीका चालक तथा मजदुरहरुमा लागुपदार्थ सेवन गर्ने प्रवृत्ति बढे पछि ट्राफिक प्रहरी कार्यालयले स्वास्थ्य परिक्षण र निगरानी सुरु गरेको छ ।
जिल्ला ट्राफिक प्रहरी कार्यालय धरानले इटहरी उपमहानगरपालिका–१२ स्वास्थ्य परीक्षण शिविर राखेर सार्वजनिक सवारीका चालक, सहचालक तथा मजदुरहरुमा लागुपदार्थ सेवन तथा स्वास्थ्य जाँच गरेको छ ।
स्वास्थ्य चेकजाँचका क्रममा १३ जनाको लागुऔषध सेवन परिक्षण गरिएको थियो । जस मध्ये ६ जनाले लागुऔषध प्रयोग गरेको पुष्टि भयो ।
परिक्षणका क्रममा लागुऔषध सेवन पुष्टि भएका व्यक्तिहरुलाई इलाका प्रहरी कार्यालय इटहरीमा राखेर थप अनुसन्धान अगाडी बढाइएको ट्राफिक प्रहरी कार्यालय धरानले जानकारी दिएको छ ।
पछिल्लो समय यातायात मजदुर तथा चालकहरूमा लागू औषध सेवन गर्ने प्रवृत्ति बढ्दै गएको निष्कर्ष निकाल्दै, सुरक्षित यातायात व्यवस्थापनका लागि स्वास्थ्य परीक्षण तथा निगरानी अभियान सुरु गरिएको जिल्ला ट्राफिक प्रहरी कार्यालय सुनसरीका प्रमुख प्रहरी निरिक्षक विरेन्द्र. सिंह थापाले जानकारी दिए ।
स्वास्थ्य शिविरमा सवारी चालक, यातायात मजदुर र सर्वसाधराण गरी एक सय १३ जनाको स्वास्थ्य परिक्षण गरिएको थियो । विशेष गरी आँखाको जाँच, उच्च रक्तचाप मापन तथा लागू औषध परीक्षण गरिएको थियो ।
कार्यक्रमलाई खनार प्रहरी चौकी, ट्राफिक प्रहरी खनार तथा सिआरभि प्रहरीले सहजिकरण गरेको थियो । आँखा जाँचका लागि अरविन्द आइकेयरले निशुल्क परिक्षण गरेको थियो भने सामुदायिक हस्पिटलले प्राविधिक सहयोग गरेको थियो ।
सडक सुरक्षाको सुदृढीकरण तथा ट्राफिक व्यवस्थापनलाई प्रभावकारी बनाउन स्वास्थ्य परीक्षणलाई सबै शहरमा लैजाने ट्राफिक प्रहरीले जनाएको छ ।
