सुनसरी–नवौँ संस्करणको हराईजन राष्ट्रिय बास्केटबल रनिङ कपको उपाधिको विभागीय टिम त्रिभुवन आर्मी क्लबले जितेको छ । मङ्गलवार भएको फाइनल खेलमा आर्मीले धरान बास्केटबल टिमलाई ७० विरुद्ध ११३ स्कोरको फराकिलो अन्तरले पराजित गर्दै उपाधि जितेको हो ।
धरानस्थित श्रीमाबिको कोर्टमा भएको फाइनल खेलमा दुई पटकको च्याम्पियन आर्मीले पहिलो क्वाटरमा ३८–१३ स्कोरको फराकिलो अग्रता लिएको थियो । ५ जना राष्ट्रिय खेलाडी लिएर फाइनलमा उत्रिएको आर्मीले दोस्रो क्वाटरमा २१–२२ स्कोरको प्रतिस्पर्धात्मक खेले पनि तेस्रो क्वाटरमा २७–१४ र चौथो तथा अन्तिम क्वाटरमा २७–२१ स्कोर गर्दै उपाधि जितेको हो ।
खेलको म्यानअफद म्याच धरानका सर्वधन राई घोषित हुँदै नगद ५ हजार पाए । प्रतियोगिताको सर्वोत्कृष्ट खेलाडी आर्मीका निश्चल महर्जन घोषित हुँदै नगद २५ हजार रुपैयाँ पुरस्कार पाए ।
उदयमान खेलाडी धरानका साहिल तामाङ घोषित हुँदै नगद १० हजार पाए । उपाधि विजेता आर्मीले नगद १ लाख ५१ हजार १ सय ११ रुपैयाँ पुरस्कार प्राप्त गरेको छ । उपविजेता धरानले ७५ हजार रुपैयाँ पाउनेछ ।
आर्मीले यसअघि पांचौ र सातौँ संस्करणको उपाधि जितेको थियो । हराइजन क्लबले आयोजना गरेको प्रतियोगितामा एक विभागीय सहित नेपालका विभिन्न ६ वटा टिमले सहभागिता जनाएका थिए ।
