विराटनगर । इटहरीको मुख्य चोकमा रहेको सेन्ट्रल प्लाजाको छतमा अड्किएका  ३ जनाको उद्धार भएको छ  । काठमाडौँबाट आएको नेपाली सेनाको हेलिकोप्टरले उनीहरूको उद्धार गरेको हो । इटहरीको मुख्य चोकमा रहेको सेन्ट्रल प्लाजामा लागेको आगो नियन्त्रणमा आउन नसकेपछि त्यहाँ अड्किएका ३ जनाको उद्दारकालागि नेपाली सेनाको हेलिकोप्टर आएको थियो । नेपाली सेनाको हेलिकोप्टरबाट उनीहरूको उद्धार गरी इटहरी स्थित नेपाली सेनाको ब्यारेकमा  अवतरण गराएको थियो ।  अब छतमा कोही अड्किएको भन्ने नभएको प्रहरीले जनाएको छ। यस  डोरीको प्रयोग गरेर ८ जनाको उद्धार भएको आगलागी स्थलमा रहेका कोसी प्रदेशका आन्तरिक मामिला तथा कानुन मन्त्री रेवती रमण भण्डारीले जानकारी दिए । १० तले प्लाजाको पाँचौँ र छैटौँ तलामा बिहान साढे ९ बजे देखी आगलागी भएको थियो । आगो अझै नियन्त्रणमा आएको छैन   आगलागी नियन्त्रणका लागि विराटनगर, इटहरी, दुहबी, रामधुनी, सुन्दरहरैचा लगायतका स्थानियतहबाट गएका आधा दर्जन दमकल, नेपाली सेना र प्रहरीले नियन्त्रणको प्रयास गरिरहेका छन् । आगलागी भएको भवनमा होटेल, सिनेमा हल, बैङ्क,  सुपर मार्केट, कपडाका पसल, मोबाइल तथा इलेकट्रोनिक्स ठुला पसलहरू सञ्चालनमा रहेका थिए ।