विराटनगर । ‘३७ करोडको लगानीमा सगरमाथा पर्यटन सडक कालोपत्रे गरिँदै’ गरेको फोटो सहितको समाचार सार्वजनिक हुन्छ ।
त्यसैलाई सोलुखुम्बुका प्रदेश सभा सदस्य बुद्धिकुमार राजभण्डारी आफ्नो असन्तुष्टि व्यक्त गर्छन् । सोलुदुधकुण्ड नगरपालिकाका मेयर नाम्गेल जाङबु शेर्पाले उक्त सडक शिलान्यास गरेको विषयमा सांसदले प्रदेशको बजेटलाई स्थानीय तहको झैँ गरेर हल्ला चलाएकोमा असन्तुष्टि जनाएका थिए ।
उनले सामाजिक सञ्जालमा सोही फोटोलाई हालेर लेखे, ‘हाँडी गाउँको जात्रा चाहिँ हाम्रै जिल्लामा हुन्छ । प्रदेश सरकारको योजना पालिकाले उद्घाटन गरेर हैरान, हन लाज हुँदैन साथी हो ? अव त लाज पनि लजाउँछ त, मेयर साव ? ’ उनले सोलुखुम्बुका नगर प्रमुखलाई खुलेआम सार्वजनिक रूपमा असन्तुष्टि सहितको आफ्नो अभिव्यक्ति सार्वजनिक गरे ।
सांसद राजभण्डारीले असन्तुष्टि जनाएपछि सोलुदुधकुण्ड नगरपालिका वडा नम्बर ९ का पूर्व वडाध्यक्ष काजी शेर्पाले जवाफ फर्काउँदै लेख्छन्, ‘विरोध किन माननीय सा’प । सोलुखुम्बु प्रदेश(क) को माननीयले हाम्रो नगरपालिका वडा नम्बर ९ को सडकका लागि बजेट छुट्टाउनु भयो, तपाईँले चैँ छुट्याएको खै त ? ’
प्रदेश सांसद भण्डारी ती पूर्व वडा अध्यक्षलाई जवाफ फर्काउँछन्, ‘हो है काजी मैले हाले भन्नु भो भनेँ त तपाईँहरूलाई लाज लाग्छ हैन र, मैले हालेको छ कि छैन रातो किताब हेर्नुस् र तपाई वार्ड अध्यक्ष हुँदा कति र कहाँ कहाँ काम गराउनु भएको थियो यसो जानकारी गराए हुँदैन र ? ’
यी संवाद स्थानीय तह र प्रदेशका बिचमा विकासका योजनामा हुने गरेको विवादका एउटा उदाहरण मात्रै हो । यस्ता समस्या हरेक पालिका र वडामा हुँदै आएको छ ।
सोलुखुम्बुको फाप्लुबाट टाक्सिन्दु हुँदै खुम्बु जोड्ने सगरमाथा पर्यटन सडक कालोपत्रेको शिलान्यास गर्ने विषयलाई लिएर उत्पन्न भएको हो । यो सडक एसियाली विकास बैङ्क (एडिबी) को सहयोगमा कोसी प्रदेशको भौतिक पूर्वाधार विकास मन्त्रालय अन्तर्गतको ग्रामीण सडक सञ्जाल सुधार आयोजना मार्फत कार्यान्वयन गर्नको लागि काम सुरु भएको हो ।
३७ करोड २८ लाख ७६ हजार ७ सय ६० रुपैयाँको लागतमा बन्ने उक्त सडकको सोलुदुधकुण्ड नगरपालिका प्रमुख शेर्पाले शिलान्यास गरेका थिए ।
फाप्लुबाट टाक्सिन्दुको रिङ्मु नजिकसम्म करिब १० किलोमिटर सडक कालोपत्रे २ वर्षभित्र सक्ने प्रदेश सरकारको तयारी छ । यो सडक प्रदेश सरकारको बहुबर्षिय योजना अन्तरगतको भएको भौतिक पूर्वाधार विकास मन्त्रालयले जनाएको छ ।
