विराटनगर । प्रदेश विपद व्यवस्थापन कार्यकारी समितिको बैठकले तीन तहका सरकार बिच समन्वय गरेर विपदबाट हुने क्षतिलाई न्यूनीकरण गर्ने निर्णय गरेको छ ।
कोसी प्रदेशका आन्तरिक मामिला तथा कानुन मन्त्री रेवती रमण भण्डारीको अध्यक्षतामा बसेको बैठकमा सबै मन्त्रालयका सचिवहरू, नेपाली सेना, नेपाल प्रहरी, सशस्त्र प्रहरी र राष्ट्रिय अनुसन्धानका प्रदेश प्रमुखहरूको सहभागिता रहेको थियो । प्रदेश सरकारले चालु आर्थिक वर्षमा विभिन्न विपदमा परेका एक सय १७ जनालाई ६१ लाख ६५ हजार रुपैयाँ राहत दिएको छ ।
विपदमा परी मृत्यु भएका ३२ जनालाई आन्तरिक मामिला तथा कानुन मन्त्रालयले र प्रति मृतक एक लाख रुपैयाँको दरले जम्मा ३२ लाख रुपैयाँ मृतकका परिवारलाई वितरण गरेको हो ।
सबैभन्दा बढी खोलाले बगाएर ११ जनाको मृत्यु भएको छ भने बाढी पहिरोबाट सात जनाको मृत्यु भएको छ । त्यसैगरी चट्याङबाट मृत्यु हुने छ जना, पहिरोमा परी मृत्यु हुने पाँच जना, बम विस्फोटमा परी उपचारको क्रममा मृत्यु भएका दुई जना तथा आगलागी र घर पहिरोले थिचेर मृत्यु भएका एक एक जनाका परिवारले राहत पाएका हुन् ।
प्राकृतिक प्रकोपबाट घरमा क्षति भएका ८५ जनाले राहत पाएका छन् । उनीहरूले कूल २९ लाख ६५ हजार रुपैयाँ राहत पाएका हुन् । पहिरोबाट घर क्षति भएका १० जनाले दुई लाख ८० हजार, बाढी पहिरोबाट घर क्षति भएका १४ जनाले दुई लाख ६० हजार, बाढीबाट घर क्षति भएका आठ जनाले एक लाख ६५ हजार, आगलागीबाट घर क्षति भएका ५२ जनाले २२ लाख ७५ हजार र हावाहुरीबाट घर क्षति भएका एक जनाले १५ हजार रुपैयाँ राहत पाएका छन् ।
