विराटनगर । राष्ट्रिय सौन्दर्यकर्मी युनियन नेपाल विराटनगर महानगर कमिटीको अध्यक्षमा बसन्ती गुरुङको नेतृत्वमा नव निर्वाचित कार्यसमिति सर्वसम्मत चयन भएको छ। शनिवार विराटनगरमा भएको चौथो अधिवेशनबाट गुरुङको अध्यक्ष तथा उपाध्यक्षमा सरिता राई, सचिव रन्जु कुमारी नायक, सह–सचिव अनुपमा पोद्दार, कोषाध्यक्षमा मिना खनाल निर्वाचित भए । सदस्यहरूमा पूर्णिमा साह, रश्मि कामत, सुनिता साह, सुजता श्रेष्ठ, अस्मिता मगर र दिपा अधिकारी, सङ्गीता कामत, ललिता राम, जमुना तामाङ, उर्मिला विक, यशोदा थापा र रचना श्रेष्ठ रहेकी निर्विरोध निर्वाचित भए ।
नवनिर्वाचित अध्यक्ष गुरुङ यस अघि सचिव थिइन् । सौन्दर्यकर्मी महिलाको हक हितमा आफ्नो नेतृत्वले काम गर्ने बताइन् ।
कार्यक्रमको उद्घाटन गर्दै विराटनगर महानगरपालिकाका उपप्रमुख शिल्पा निराला कार्कीले महिलाहरूको नेतृत्व विकास लागि महानगरपालिकाले सधैँ सहयोग गर्ने प्रतिबद्धता जनाइन् । सीप विकासको क्षेत्रमा महानगरले सबैलाई सहयोग गर्ने आएको अवस्थामा महिला लक्षित धेरै कार्यक्रमहरूमा सहयोग रहँदै आएको स्पष्ट पारिन् ।
नेपाल टेड युनियन महासङ्घ (जिफन्ट) कोसी प्रदेश युवा कमिटी अध्यक्ष तथा नावुन विराटनगरको निवर्तमान अध्यक्ष भली सुब्बाले सौन्दर्यकर्मीहरू एकताबद्ध भएर लाग्नु पर्ने बताइन् । सौन्दर्यकर्मी युनियन जहिले पनि जिफन्टको नीति र परिधीमा रहेर आफ्नो काम कर्तव्यमा दृढ रहेको संस्था भएको बताइन् ।
जिफन्ट कोसी प्रदेशका अध्यक्ष किशोर धमलाले राज्यले लागू गरेको योगदानमा आधारित सामाजिक सुरक्षा कोष कार्यान्वयन गरेर अगाडी पढ्नु अहिलेको आवश्यकता रहेको बताए । जिफन्टले यो विषयलाई पहिलो प्राथमिकतामा राख्दै आएको उनले सुनाए ।
कार्यक्रममा नावुन केन्द्रीय सदस्य गङ्गा तामाङ, नावुन कोसी प्रदेश अध्यक्ष कला डाँगी, सायदा तवसुमलगायतले बोलेका थिए । सोही अवसरमा मजदुरहरूको हकहितमा लामो समयदेखि काम गर्दै आएका मुरारी प्रसाद भट्टराई र नावुन कोसी प्रदेशको पूर्व उपाध्यक्ष ललिता धिमाललाई सम्मान गरिएको छ ।
