विराटनगर । ताप्लेजुङको मुक्कुमलुङ (पाथिभरा) क्षेत्रमा निर्माण भइरहेको केबलकार निर्माणको काम यथास्थितिमा राख्न सर्वोच्च अदालतले आदेश दिएको छ । सर्वोच्च अदालतले दुवै पक्षलाई अदालतमा बोलाएको छ ।
सर्वोच्च अदालतमा याम बहादुर लिम्बू समेतका निवेदकले पाथीभरा देवी दर्शन केबलकार प्रालि समेतलाई विपक्षी बनाई दायर गरेको रिटमा सुनुवाइ गर्दै सर्वोच्च अदालतले दुवै पक्षलाई अदालतमा चैत २६ मा बोलाएको हो ।
न्यायाधीश शारदा सुवेदीको इजलासले अन्तरिम आदेशका हुनुपर्ने हो वा होइन भन्ने निष्कर्षमा पुग्न दुवै पक्षलाई अदालतमा बोलाएको हो। त्यस बेलासम्म केबलकार निर्माणको काम यथास्थितिमा राख्न पनि अदालतले भनेको छ ।
अदालतले भनेको छ, ‘निवेदकले अन्तरिम आदेश समेत जारी हुन माग गरेको सम्बन्धमा विचार गर्दा, प्रस्तुत निवेदनमा उठाइएको विषयवस्तुको प्रकृति र गाम्भीर्यता हेर्दा दुवै पक्षको सुनुवाइ गरी अन्तरिम आदेश जारी हुनुपर्ने हो वा होइन भन्ने विषयमा निष्कर्षमा पुग्न उपयुक्त हुने देखिएकोले हालसम्म भए गरेका काम कारबाहीहरू यथास्थितिमा राखी अन्तरिम आदेश सम्बन्धमा छलफलको लागि उपस्थित हुन मिति २०८१।१२।२६ गतेको पेसी तोकी सो को जानकारी विपक्षीहरू समेतलाई दिनू।’
पाथीभरामा केबलकार निर्माण गर्न नहुने भन्दै पहिचानवादी पक्षहरु सडक आन्दोलन गर्दै आएका छन् । सरकारसँग भएको वार्ता पनि विना निष्कर्ष टुंगिएको थियो ।
