सुनसरी । सशस्त्र प्रहरी महानिरीक्षक राजु अर्यालले इटहरीको सेन्टर प्लाजामा भएको आगलागी नियन्त्रण तथा उद्धारमा सशस्त्र प्रहरीको टोलीले उत्कृष्ट भूमिका निभाएको भन्दै पुरस्कृत गरिने बताएका छन् ।
सशस्त्र प्रहरी बल नेपाल नं १ बराह बाहिनी मुख्यालय सुनसरीको २४ औँ स्थापना दिवसको अवसरमा सोमबार आयोजित कार्यक्रमलाई सम्बोधन गर्दै अर्यालले इटहरी सेन्टर प्लाजा आगलागी घटनामा सशस्त्र प्रहरीले प्रशंसनीय काम गरेकोमा सङ्गठनको शिर उच्च बनेको बताए । उनले भने– चैत्र १३ गते इटहरी स्थित सेन्टर प्लाजामा भएको आगलागी नियन्त्रण तथा उद्धारमा सशस्त्र प्रहरीको टोलीले उत्कृष्ट भूमिका निभाएको छ, यसको गृह मन्त्रालयमै प्रशंसा भएको छ यस कार्यमा सहभागीहरूलाई पुरस्कृत तथा सम्मान समेत गरिने छ ।
बिपत व्यवस्थापन तथा उद्धारको काममा सशस्त्र प्रहरीले उत्कृष्ट काम गरेको भन्दै अर्यालले यसको सम्पूर्ण श्रेय फिल्डमा खटिने सिपाही तथा त्यसको नेतृत्व गर्ने अधिकृतलाई जाने बताए ।
सीमा क्षेत्रबाट हुने लागु औषध ओसारपसार तथा दुर्ब्यसनबिरुद्ध रणनीतिक योजना बनाएर अघि बढ्न समेत उनले निर्देशन दिएका छन् । अर्यालले लागु औषधको समस्याले युवाहरू लतमा फस्दा देशको सुरक्षा अवस्था समेत बिग्रने बताए । सीमा क्षेत्रबाट हुने लागु औषधको ओसारपसारलाई नियन्त्रण गर्न सूचनाको ठुलो महत्त्व हुनेभन्दै यसमा सञ्चारकर्मी सहित सबै क्षेत्रको समन्वयात्मक भूमिकाको खाँचो रहेको अर्यालले बताए ।
सीमामा हुने लागु औषधको समस्यालाई न्यूनीकरण गर्न सशस्त्र प्रहरी बलले उच्च महत्वको साथ काम गरिरहेको अर्यालले दाबी गर्दै अर्यालले लागु औषधको प्रमुख समस्या रहेको कोसी प्रदेशमा विशेष योजना बनाएर काम गर्न बराह बाहिनी मातहतका सुरक्षा अधिकारीलाई अर्यालले निर्देशन दिए ।
सीमा सुरक्षा र राजश्व चुहावट नियन्त्रणको काममा बराह बाहिनी अन्तर्गतको विभिन्न इकाइले गरेको काम उत्कृष्ट रहेको बताउँदै यसमा सबै क्षेत्रबाट सहयोग हुनुपर्ने अर्यालले बताए । कतिपय कानुनी समस्याको कारणले केही जटिलता आएकोले काम गर्न असहज भएको बताएरै अर्यालले संसदीय समितिमा दफावार छलफलको लागि गएको सशस्त्र प्रहरी विधेयकले पारित भएपछि काम गर्न सहज हुने जानकारी दिए ।
कार्यक्रममा बराह बाहिनी मुख्यालयका बाहिनी पति सशस्त्र प्रहरी नायब महानिरीक्षक शम्भु सुबेदीले सीमित श्रोत र साधनका बाबजुद पनि सीमा सुरक्षा र राजश्व चुहावट नियन्त्रणको काममा खटिरहेको बताए ।
२४ औँ स्थापना दिवसको अवसरमा सशस्त्र प्रहरी महानिरीक्षक अर्यालले वीरगतिप्राप्त राष्ट्र सेवकका परिवार सहित सशस्त्र प्रहरी बललाई सहयोग गर्ने संघ संस्था र उत्कृष्ट कार्य गर्ने प्रहरी कर्मचारीलाई सम्मान गरे ।
