विराटनगर । सुनसरीको इटहरीमा राजावादीहरूले साँझ प्रदर्शन गरेका छन् । इटहरीको मुख्य चोकमा गणतन्त्र मुर्दावाद सहितको नारा लगाउँदै सरकार विरुद्ध प्रदर्शन गरेका हुन् । राष्ट्रवादीको नाम दिएर निस्किएको जुलुसमा सहभागीले गणतन्त्रलाई लुटतन्त्र, भ्रष्ट तन्त्र भन्दै प्रदर्शन गरेका हुन् । इटहरी चोकबाट विराटनगर लाइन हुँदै बसपार्क तर्फ मोडिएर फेरी इटहरी चोकमा मसाल जुलुस निकालेका थिए । प्रदर्शनमा सहभागीहरूले राजतन्त्र फर्काउनु पर्ने, सिन्डिकेट तन्त्र, लुटतन्त्रको अन्त्य गर्नु पर्ने, हिन्दु राज्य कायम गर्नु पर्ने तथा जनता मार्न पाइँदैन उनीहरूले गणतन्त्र विरोधको नारा लगाएका थिए ।
इटहरी चोकमा प्रदर्शनकारी र प्रहरी बिच केही बेर घम्साघम्सी भएको थियो । प्रहरीले राँके जुलुस नियन्त्रणमा लिन खोज्दा केही बेर लफडा भएको सुनसरीका प्रहरी प्रमुख प्रहरी उपरीक्षक सुमन तिमल्सिनाले जानकारी दिए । इटहरीमा प्रहरी र प्रदर्शनकारी बिच केही बेर हानाहान भएको थियो ।
त्यस्तै झापाको झिलझिले, दमकमा पनि राजावादीहरूले सरकारको विरुद्धमा साँझ प्रदर्शन गरेका छन् ।
