विराटनगर । कोसी प्रदेशको उद्योग कृषि तथा सहकारी मन्त्रालयले सहकारी सिद्धान्त परिपालनाका सूचकहरू कार्यान्वयनमा लग्ने भएको छ । आइतबार र सोमबार दुई दिनसम्म विराटनगरमा भएको छलफल पछि सूचक तयार भएर अब कार्यान्वयनमा लग्ने अन्तिम तयारी भएको जानकारी दिइएको हो । ६८ औँ सहकारी दिवसको अवसर पारेर आयोजित कार्यक्रममा सहकारीलाई व्यवस्थित गर्नको लागि सूचक सहकारीहरूले अनिवार्य कार्यान्वयन गर्नु पर्ने कोसी प्रदेश सहकारी रजिस्टार कार्यालयले जनाएको छ । कार्यालयका रजिस्टार हरिबहादुर खत्रीले दुई दिनसम्म भएको छलफल पछि सूचक कार्यान्वयन गर्न लागिएको बताए ।
सहकारी क्षेत्रका अगुवाहरूलाई राखेर सूचक कार्यान्वयन गर्ने बारेमा छलफल भएकोले अब कार्यान्वयनमा लग्न सजिलो हुने उनको भनाई छ । कोसी प्रदेश सरकार उद्योग कृषि तथा सहकारी मन्त्रालयका सचिव डा सरणकुमार पाण्डेले सहकारीहरूलाई अब नियमन अनिवार्य भएको बताए । सफ्टवेयरको नियमन सुरु भइसकेकोले अब सूचकहरू सबै सहकारी मार्फत कार्यान्वयन हुनेमा आफू विश्वस्त रहेको बताए । सहकारी सिद्धान्तको परिपालनका सूचकहरू प्रदेश सरकारले बनाइसकेकोले त्यो अब सबै सहकारी मार्फत कार्यान्वयन हुने भनिएको छ । प्रदेश बचत सङ्घ कोसीका अध्यक्ष हरि सुवेदीले सूचकलाई सूक्ष्म विश्लेषण गरी सहकारी र गैर सहकारी गतिविधि गर्ने सहकारीको नियमन हुने बताए । उनले सबै सहकारीमा यो सूचक पुग्ने र सहकारीले सूचक अनिवार्य लागू गर्नु पर्ने बताए ।
सहकारीलाई सम्मान र पुरस्कार
दुई दिने कार्यक्रम पछि सोमबार सहकारी दिवसको अवसर पारेर विशेष कार्यक्रमको आयोजना गरिएको छ ।
कार्यक्रममा सहकारीको क्षेत्रमा उल्लेख्य काम गर्ने विभिन्न विधाका ३वटा सहकारीलाई पुरस्कृत गरिएको थियो । सहकारी क्षेत्रमा राम्रो काम गर्ने राष्ट्र सेवक बचत तथा ऋण सहकारी संस्था विराटनगर, महिला कृषक सहकारी संस्था चौदण्डी गढी उदयपुर र शुभ लक्ष्मी बहुउद्देश्यीय सहकारी संस्था गौरादह झापालाई पुरस्कृत गरिएको रजिस्टार खत्रीले जानकारी दिए । त्यस्तै सहकारी अभियानकर्मी, कर्मचारी र सञ्चालकलाई पनि पुरस्कृत गरिएको छ । सहकारी सञ्चालक कमलेश्वर ठाकुर, व्यवस्थापक कृष्णाकुमारी अधिकारी र सहकारीका फिल्ड कर्मचारी राजेश जोशीलाई पुरस्कार सहित सम्मानित गरिएको हो ।
केशवप्रसाद रेग्मीलाई प्रदेश उद्योग कृषि तथा सहकारी मन्त्रालयले अभिनन्दन गरेको छ । कार्यक्रममा प्रदेश सहकारी सङ्घका कोसीका अध्यक्ष डा डिल्ली पोखरेलले ६८ ओ सहकारी दिवस मनाउँदै गर्दा अहिले सहकारीहरू प्रति नकारात्मक सन्देश प्रवाह भइरहेकाले त्यसलाई सबै मिलेर रोक्नु पर्ने बताए । उनले अभियानलाई बलियो बनाउन विभिन्न अभियानका कार्यक्रम दिवसको अवसर पारेर आयोजना गरिएको जानकारी दिए ।
मोटरसाइकल र्याली, दीपावली र २० गते औपचारिक कार्यक्रम आयोजना गरी सहकारी दिवस मनाउन सबै एक भएर लागिएको समेत बताए । सहकारी अभियानकर्मी लक्ष्मी सापकोटाले सबै मिलेर सहकारीको विकास गर्नु पर्ने र ईमान्दार भएर सहकारी अभियानमा लाग्ने प्रतिबद्धता जनाए ।
