सुनसरी । राजावादीहरुको प्रर्दशनका क्रममा पत्रकार सुरेश रजकको हत्या र विभिन्न मिडिया माथि भएको सुनियोजित आक्रमणको विरोधमा नेपाल पत्रकार महासंघ सुनसरीले प्रमुख जिल्ला अधिकारीलाई ज्ञापन पत्र बुझाएको छ ।
सुनसरीका प्रमुख जिल्ला अधिकारी धर्मेन्द्र मिश्र मार्फत गृहमन्त्री रमेश लेखक समक्ष पुर्याउने गरी पत्रकार महासंघ सुनसरीले ज्ञापन पत्र बुझाएको हो ।
मंगलबार जिल्ला प्रशासन कार्यलयमा पुगेको महासंघको टोलीले हत्यामा संलग्न दोषीलाई कारबाही गर्न, पीडित परिवारलाई तत्काल राहत प्रदान गर्न, घाइते पत्रकारको उपचारको व्यवस्था गर्न र पत्रकारहरुको सुरक्षाको ग्यारेन्टी गर्न माग गरेको छ ।
महासंघले बुझाएको ज्ञापन पत्र बुझ्दै प्रमुख जिल्ला अधिकारी धर्मेन्द्र मिश्रले ज्ञापन पत्रलाई गृह मन्त्रालयमा पठाउने प्रतिवद्दता व्यक्त गरे । प्रजिअ मिश्रले जिल्लामा कार्यरत पत्रकारहरुको सुरक्षाको विषयमा आफु गम्भिर रहेको बताउँदै पत्रकारहरुलाई सुरक्षित रुपमा कार्य गर्ने वातावरण तयार गर्ने बताए । पत्रकारहरु स्वयंमले पनि आफ्नो सुरक्षामा ध्यान दिनुपर्ने उनले बताए । सुचना सम्प्रेषण गर्ने विषयमा पनि पत्रकारहरु संवेदनशिल बन्न प्रजिअ मिश्रले आग्रह गरे ।
पत्रकार महासंघ केन्द्रीय समितिको घोषित कार्यक्रम अनुसार ज्ञापन पत्र बुझाइएको नेपाल पत्रकार महासंघ सुनसरीका सचिव विनय बाराकोटीले जानकारी दिए ।
महासंघ केन्द्रीय समितिले शनिबारबाट आन्दोलन घोषणा गरेको छ । आन्दोलनको कार्यक्रम अनुसार पत्रकारहरुले कार्यक्षेत्रमा काम गर्दा कालोपट्टि बाँधेर काम गरेका थिए ।
