सुनसरी– कोसी प्रदेशमा विद्यालयसँग प्रदेशसभा कार्यक्रम सुरु भएको छ ।
बिद्यालयस्तरका छात्र छात्राहरूमा प्रदेश सभाको काम कर्तव्य र अधिकारको विषयमा जानकारी पुर्याउने उदेश्वले कोसी प्रदेशसभा सचिवालयले कार्यक्रम सुरु गरेको हो । कार्यक्रम अन्तर्गत बुधवार इटहरी उपमहानगरपालिका—९ स्थित जनता माध्यमिक विद्यालयका विद्यार्थीहरूमाझ सचिवालयले कार्यक्रम गर्दै संसदीय अभ्यास समेत गराएको छ ।
सभामुख अम्बरबहादुर विष्ट र उपसभामुख सृजना दनुवारको उपस्थितिमा भएको कार्यक्रममा विद्यार्थीहरूलाई प्रदेशसभाको कार्य प्रणाली र लोकतान्त्रिक प्रक्रियाको महत्त्व बुझाउन नमुना अभ्यास कार्यक्रमको आयोजना गरिएको हो । कार्यक्रममा विद्यार्थीहरूले प्रत्यक्ष रूपमा संसद्को बैठकको नमुना अभ्यास गर्दै प्रदेशसभाको विभिन्न पदमा रहेका व्यक्तिहरूको भूमिकामा अभिनय गरेका थिए । कार्यक्रमलाई सम्बोधन गर्दै कोसी प्रदेशका सभामुख विष्टले कार्यक्रमको उद्देश्य विद्यार्थीहरूमा लोकतान्त्रिक मूल्य र सिद्धान्तको विकास गर्नु रहेको बताए ।
उनले भने,– ‘यस अभ्यासमा सहभागी हुने विद्यार्थीहरूले विभिन्न विधायिका प्रक्रियाहरूको बारेमा जानकारी प्राप्त गरे, उनीहरूले विधेयकको प्रस्ताव, छलफल र मतदान जस्ता महत्त्वपूर्ण चरणहरूको अनुभव गरेका छन् ।’ सभामुख विष्टले विद्यार्थीहरूको लागि यस प्रकारको संसदीय अभ्यासले महत्त्वपूर्ण मुमिका खेल्ने बताए ।
आगामी दिनहरूमा यस किसिमका कार्यक्रमहरूलाई थप प्रभावकारी र समावेशी बनाउनका लागि आवश्यक कदम चाल्ने विष्टले जानकारी दिए ।
यसअघि मोरङको सुन्दरहरैचास्थित सुकुना माध्यमिक विद्यालयमा कार्यक्रम सम्पन्न गरेको सचिवालयले अन्य विद्यालयमा पनि निरन्तरता दिने जनाएको छ ।
