सुनसरी– नेकपा एमालेका महासचिव शंकर पोखरेलले चैत १५ गते काठमाण्डौमा भएको घटनाको मुख्य योजनाकार पूर्वराजा ज्ञानेन्द्र शाह भएको आरोप लगाएका छन ।
नेकपा एमाले सुनसरी जिल्ला कमिटिले इटहरीमा बुधबार गरेको जनजागरण सभालाई सम्बोधन गर्दै पोखरेलले चैत १५ गते पूर्वराजा ज्ञानेन्द्र शाहको उक्साहटमा पूर्वराजावादीहरुको अराजक समुहले काठमाडौ तीनकुने, कोटेश्वर र जडिवुटी लगायतका क्षेत्रमा देखाएको उदण्डता, अराजकता र हिंसा मच्चाएको आरोप लगाए ।
अहिलेको अराजकताको कारक पूर्वराजा ज्ञानेन्द्र शाहनै भएको आरोप लगाउदै पोखरेलले यसको सम्पूर्ण जिम्मेवारी पूर्वराजाले लिनुपर्ने बताए । पूर्वराजाले गत फागुन ७ गतेनै संबिधानको खिलापमा आव्हान गरेर चैत्र १५ गते बिध्वंश मच्चाएको आरोप लगाए ।
दुर्गा प्रसाइले मच्चाएको उदण्ड क्रियाकलापको भागिदार प्रसाई पनि हुने बताउदै पोखरेलले उनलाई उचाल्ने काम पनि पूर्वराजाले गरेको दाबी गरे ।
चैत्र १५ गतेको घटनाको बिषयमा पूर्वराजाको धारणा अहिलेसम्म नआएको उल्लेख गर्दै पोखरेलले आधिकारीक धारणा जनता माझ स्पष्ट पार्न आग्रह समेत गरे । पूर्वराजा आफ्नै परिवारको निम्ति मात्र नभएर सबै नेपालीका लागि बैगुनी मान्छे रहेको पोखरेलको टिप्पणी थियो ।
