विराटनगर । स्वास्थ्य परीक्षणको क्रममा सवारी चालकहरूले लागु औषध सेवन गर्ने क्रम बढ्दै गएको छ । जिल्ला ट्राफिक प्रहरी कार्यालय मोरङले पूर्व पश्चिम राजमार्गको बेलवारी नगरपालिका वडा नम्बर १ मा स्वास्थ्य परीक्षण गरेको थियो । प्रदेश प्रहरी अस्पताल इनरुवा र विराटनगर आँखा अस्पतालको सहकार्यमा चालक तथा सह चालकहरूको स्वास्थ्य परीक्षण गर्दा ११ जनाले लागु पदार्थ सेवन सवारी चलाएको फेला परेको प्रहरीले जनाएको छ । यसरी लागु पदार्थ सेवन गरेर सवारी साधन चलाउनेमा टिपर चालक ४ जना, यात्रुबहाक बसका चालक ४ जना, ट्रकका २ जना र ट्याक्टर चालक १ जनालाई नियन्त्रणमा लिएको छ । ११५ जनाको स्वास्थ्य परीक्षण गरिँदा ५५ जना सवारी चालकहरूको लागु पदार्थ सेवन गरे नगरेको परीक्षण भएको जिल्ला ट्राफिक प्रहरी कार्यालय विराटनगरले जनाएको छ । परीक्षणको क्रममा प्रेस, सुगर, आँखा जाँच गर्नुको साथै उनीहरूलाई औषधी समेत वितरण गरिएको थियो । लागु औषध प्रयोग गरेको फेला परेका ११ जनालाई प्रहरी कार्यालय बेलवारीमा राखेर थप अनुसन्धान भइरहेको जिल्ला ट्राफिक प्रहरी कार्यालय मोरङका प्रहरी निरीक्षक राजन लम्सालले जानकारी दिए ।
