सुनसरी । बालीमा मल हाल्ने समयमा रासायनिक मलको अभाव भएपछि सुनसरीका कृषकहरु समस्यामा परेका छन् ।
विशेष गरी मकै बाली र भदै धान खेतीका लागि मल हाल्ने समयमा रासायनिक मलको अभाव भएको कृषकहरुले गुनासो गरेका छन् ।
मकै खेती हुने तराईमा सुनसरी, मोरङ र झापा सहितका जिल्लाहरुमा मलको ठुलो अभाव देखिएको छ ।
बारीमा मल हाल्ने समयमा कतै पनि मल नपाएको सुनसरी बराहक्षेत्र नगरपालिका १० का कृषक घनश्याम कार्कीले गुनासो गरे ।
कृषक कार्कीले प्रत्येक बर्ष कृषि सामाग्री कम्पनी इटहरीबाट मल खरिद गरेर लैजाने गरेको बताए । तर यसपाली पटक पटक कृषि सामाग्री कम्पनी धाउँदा पनि मल नपाएको कार्कीले गुनसो गरे ।
यस्तै इटहरी २ का कृषक राम बहादुर बस्नेतले पनि मल नपाएको बताए । वडाले तोकेको संस्थामा धेरै पटक धाउँदा मल नपाएको बस्नेतले जानकारी दिए ।
सुनसरीका कृषकहरुका लागि मल विक्रि गर्ने आधिकारीक संस्था इटहरीमा रहेको कृषि सामाग्री कम्पनी हो । यहिँबाट जिल्ला भरका लागि विभिन्न कृषी सहकारी तथा कृषी संस्थाहरु मार्फत मल विक्रि गर्दै आएको छ ।
अघिल्लो बर्षको भन्दा बढि मकै खेती भएका कारण बजारमा रासायनिक मल अभाव भएको कृषी सामाग्री कम्पनी इटहरीका प्रमुख राम कुमार चौधरीले जानकारी दिए । प्रमुख चौधरीले भने, ‘अघिल्लो बर्षको तुलनामा यस बर्ष कृषकले मकै खेती धेरै लगाएका कारण मल अभाव देखियो ।’
गत आ.ब.मा ६ हजार ८ सय ८३ मेट्रिक टन युरिया, ४ हजार ७ सय मेट्रिक टन डिएपी र ४ सय २२ मेट्रिक टन पोटास वितरण गरिएको कृषि सामाग्री कम्पनी इटहरीले जानकारी दिएको छ ।
प्रमुख चौधरीका अनुसार गत आ.ब कै कोटा अनुसार चालु आ.बका लागि रासायनिक मल आपुर्ति गरिएको थियो । साउन महिना यता साढे ८ हजार मेट्रिक टन युरिया, ५ हजार मेट्रिक टन डिएपी र तीन सय मेट्रिक टन पोटास वितरण गरिएको कृषि सामाग्री कम्पनी इटहरीले जानकारी दिएको छ ।
मलको अभाव देखिए पछि कम्पनीले थप मल आपुर्तिका लागि माथिल्ले निकायमा पत्र पठाइसकेकाले चाँडै समस्या समाधान हुने प्रमुख चौधरीले बताए । अबका ३ महिना बैशाख, जेठ र असार सम्मका लागि ४÷४ हजार मेट्रिक टन मलको आवश्यकता पर्ने देखिएको कृषी कम्पनी इटहरीका प्रमुख चौधरीले जानकारी दिए ।
कृषी कम्पनी मार्फत सुनसरीमा एक सय ३५ डिलर मार्फत रासायनिक मल वितरण हुँदै आएको छ । पछिल्ला बर्षयता पालिका अनुसार नै कोटा तोकिए अनुसार मल वितरण हुँदै आएको प्रमुख चौधरीले जानकारी दिए ।
तराईका झापा, मोरङ र सुनसरी हिउँदे बालीको पकेट क्षेत्रमा पर्दछन् । तोरी, गहुँ,मकै, आलु लगायतका बाली धेरै क्षेत्रफलमा लगाउने गरिन्छ । जसका कारण यहाँ रासायनिक मलको माग धेरै छ ।
