सुनसरी । दोस्रो इटहरी मेयर कप अन्तरपालिका क्रिकेट प्रतियोगिताको दोस्रो दिनको खेलमा भोक्राहा नरसिंह गाउँपालिका र दमक नगरपालिका विजयी भएका छन् ।
शनिबार भएका पहिलो खेलमा धरान उपमहानगरपालिकालाई ३१ रनले पराजित गर्दै भोक्राहा नरसिंह गाउँपालिका विजयी भएको हो ।
१६ ओभरमा छोट्याएको खेलमा भोक्राहाले ४ विकेटको क्षतिमा १३२ रनको स्कोर बनाएको थियो । भोक्राहाका लागि अविशेक शर्मा ले ३८ रन,अफन ताहिरले १७ ,रोशन क्षेत्रीले १६ रन, सागर मलिक र सिबन यादवले समान १९÷१९ रन बनाएका थिए ।
१३३ रनको लक्ष्य पछ्याएको धरान उपमहानगरका प्रकाश शाहले ३० रन, दानिश चौधरीले २५ ,अभिनाश यादव ले १७ रन जोडे ।
धरान उपमहानगरलाई रोक्नका लागि भोक्राहाका सौगात भट्टराईले ४ विकेट लिए भने दिपेन कामतले ३ विकेट लिए । यस्तै सिवान यादव र ज्ञानेन्द्र यादवले समान १÷१ विकेट लिएका थिए । खेलको म्यान अफ द म्याच सौगात भट्टराइ घोषित भए ।
यस्तै आज भएको दोस्रो खेलमा इटहरी उपमहानगरपालिका निलो टिम २ रनले पराजित भएको छ । इटहरी निलोलाई २ रनको झिनो अन्तरले पराजित गर्दै दमक नगरपालिका विजयी भएको हो ।
टस जिते पहिलो ब्याटिङ गरेको दमक नगरपालिकाले ८ विकेट गुमाउँदै १२५ रन बनायो । दमकका लागि सन्तोष सिंहले ३९ रन बनाए । यस्तै भुपाल दंगाललले १२ रन, दिब्यम अधिकारी र आर्यन सुनुवारले समान १३ रन बनाए ।
दमकलाई सस्तैमा रोक्नका लागि इटहरी निलोका खेलाडी कबिराज घिमिरेले एक्लै ५ विकेट लिए । यस्तै बलराम मण्डल, रिजन पान्डे र आदित्य चौधरीले समान १÷१ विकेट लिए ।
१२६ रनको लक्ष्य पाएको इटहरी उपमहानगरपालिकाको निलो टिमले राम्रो स्कोर खेले पनि जित निकाल्न भने सकेनन् । इटहरी निलोका रिजन पाण्डेले अविजित ३९ रन जोडे पनि टिमलाई जिताउन भने सकेनन् । यस्तै उमेश साहले २० रन, कविराज घिमिरेले २० रन, आकाश सराफले ११ रन बनाएका थिए ।
खेलमा व्यक्तिगत ५ विकेट र २० रनको योगदान पुर्याउने इटहरी निलो टिमका कविराज घिमिरे म्यान अफ द म्याच घोषित भए ।
इटहरी उपमहानगरपालिकाले संयोजन गरेको प्रतियोगितामा झापा, मोरङ, सुनसरी उदयपुर र धनकुटा जिल्लाका १८ वटा पालिकाको टिमहरूले सहभागिता जनाएका छन् ।
चैत ३० गतेसम्म चल्ने प्रतियोगिताको विजेताले नगद १ लाख रुपैयाँ र ट्रफी पाउनेछ । उपविजेता टिमले नगद ५० हजार पाउने आयोजक सेभेनस्टार क्लबले जनाएको छ ।
प्रतियोगिताकोको सर्वोत्कृष्ट खेलाडीलाई नगद ७ हजार प्रदान गरिने र उत्कृष्ट ब्याटर र बलरलाई जनही चार चार हजार रुपैयाँ प्रदान गरिने कार्यक्रम संयोजक सिपी पौडेलले जानकारी दिए ।
