सुनसरी । कोसी प्रदेश सरकारले प्रदेशसभाबाट पारित गर्ने तयारी गरेको ‘प्रदेश आमसञ्चार सम्बन्धी व्यवस्था गर्न बनेको विधेयक, २०८१ होल्ड भएको छ । सरकारकै अकर्मण्यताका कारण विधेयक ‘होल्ड’ हुन पुगेको हो ।
संविधानले ग्यारेन्टी गरेको प्रेस स्वतन्त्रता विरोधी प्रावधान सहितको विधेयक कोसी सरकारले ल्याएपछि पत्रकार र सञ्चारसम्बद्ध संघ संस्थाले आन्दोलन गरेका थिए ।
संशोधन गरेर मात्रै विधेयक ल्याउन माग गर्दै आन्दोलन भइरहेका बेला विधेयक नै ‘होल्ड’ गरिएको हो । संसदीय समितिमा सहमतिपछि संसदमा पेस भएको विधेयक शुक्रवार पास गर्ने तयारी थियो ।
तर, विधेयकमा भएको प्रावधानका विषयमा असन्तुष्टि जनाउँदै नेपाल पत्रकार महासंघ लगायत विभिन्न सञ्चार सम्बद्ध संघ संस्थाको विरोधपछि सरकारले विधेयक ‘होल्ड’ गरेको हो । अब यो विधेयक थप छलफलपछि मात्रै पास गरिनेछ ।
पत्रकारको आन्दोलनका कारण मुख्यमन्त्री हिक्मतकुमार कार्कीले पनि तत्काल विधेयक अघि नबढाउने बताउनु भएको थियो । कोसी प्रदेश आमसञ्चारका सम्बन्धमा व्यवस्था गर्न बनेको विधेयक, २०८१’ प्रदेशसभामा २०८१ माघ १८ गते दर्ता भएको थियो ।
प्रदेशसभामा छलफलका क्रममा १३ वटा संशोधन दर्ता भएपछि छलफलका लागि प्रदेशसभाको न्याय प्रशासन तथा विधायन समितिमा पठाइएको थियो ।
मिनी संसदको रूपमा रहेको समितिले कारबाही र जरिबानाको थप प्रावधान सहितको प्रतिवेदन गत शुक्रबारको प्रदेशसभा बैठकमा पेस गरेको थियो
