विराटनगर । नेपालमा नाटकको परम्परा अत्यन्त पुरानो रहेपनि यसको प्रबर्द्धन र विकासमा अझै राज्यको ध्यान आवश्यक रहेको वक्ताहरूले बताएका छन्। एलिट क्लबले आयोजना गरेको ‘नेपालको नाट्य परम्परा र नवीन प्रवृत्ति’ विषयक अन्तरक्रिया कार्यक्रमका वक्ताहरूले यसकाे प्रबर्द्धनमा सरकारले ध्यान दिनु पर्ने बताए । कार्यक्रमका प्रमुख वक्ता नेपाल संगीत तथा नाट्य प्रज्ञा–प्रतिष्ठानकी कुलपति निशा शर्माले नाट्य क्षेत्रले समाज रूपान्तरणमा ठूलो भूमिका खेल्नसक्ने धारणा राखिन्।
उनका अनुसार नेपालमा नाटकको आरम्भ धार्मिक प्रस्तुतिबाट भएको हो भने अहिले समसामयिक मुद्दामा आधारित विषयवस्तु लेखिन थालेका छन्। २०६२/०६३ सालको जनआन्दोलनलाई प्रतिबिम्बित गर्ने कृति ‘अग्निपथ’ मार्फत लेखक अभि सुवेदीले समाजमा गहिरो प्रभाव पार्न सफल भएको स्मरण गर्दै शर्माले साहित्यजस्तै नाटकले पनि समाजपरिवर्तनको दिशा दिन सक्ने औंल्याइन्। विशेषगरी ग्रामीण क्षेत्रमा क्रियाशील नाटककर्मीलाई मूल प्रवाहमा ल्याउन राज्यको सहयोग अपरिहार्य रहेकोमा जोड दिईन्।
क्लब अध्यक्ष विश्वनाथ रिजालले अध्यक्षता गरेकाे कार्यक्रमकाे स्वागत मन्तव्य अर्थसचिव मणि अर्ज्यालले गरेका थिए । उनले नेपालमा नाटक हेर्ने संस्कृतिलाई पुरानो मान्दै पनि यसबारे सार्वजनिक तहमा पर्याप्त बहस र छलफल नहुने भएकाले क्लबले यो अन्तरक्रियाको आयोजना गरेको बताए।
महासचिव यज्ञप्रसाद शर्माले नाट्य क्षेत्रको विकासका लागि नेपाल प्रज्ञा–प्रतिष्ठानको भूमिकाबारे चर्चा गर्दै यस क्षेत्रमा लाग्ने युवाहरूले पेशागत रूपमा जीवन धान्न सक्ने वातावरण बनाउन राज्यको ध्यानाकर्षण गराए।
अन्तरक्रियामा प्राध्यापक डा. खगेन्द्र आचार्य, प्राध्यापक डा. मेदिनी शर्मा, प्राध्यापक डा. बाबुराम तिमल्सिना, प्राध्यापक कृष्ण पोखरेल र साहित्यकार एकराज भट्टराईलगायतका सहभागिता रहेको थियो।
