विराटनगर । सुनसरी ४ बाट एमालेबाट उम्मेदवार पाएर पनि टिकट खोसिएका अब्बुल हुसेन अन्सारीले बाहिरबाट आएर उम्मेदवार बन्नेहरूलाई हराउनु पर्ने बताएका छन् ।
निर्वाचन अधिकृतको कार्यालयमा मनोनयन दर्ताका लागि पुगेका एमाले उम्मेदवार जगदीश कुसियैतको समर्थनसहित अन्सारीले बाहिरबाट आएर हालीमुहाली गर्नेहरूलाई हराउन एमाले प्रवेश गरेको बताए ।
कांग्रेसबाट यस क्षेत्रका दाबेदार हुसेनले टिकट नपाउने भएपछि हिजै एमाले प्रवेश गरेर टिकट ल्याएका थिए । तर, पार्टी पङ्क्तिमा चौतर्फी विवरोधपछि उनको टिकट खोसेर कुसियैतलाई नै अघि सारिएको छ ।
सुनसरी ४ मा कांग्रेसबाट ज्ञानेन्द्रबहादुर कार्की विजयी हुँदै आएका छन् । भोजपुरमा ३ पटक पराजित भएपछि सुनसरी झरेका कार्कीलाई यहाँ कांग्रेसकै नेता तथा कार्यकर्ताहरूले टुरिस्ट उम्मेदवार बन्दै आलोचना गरेका छन् ।
