विराटनगर । विराटनगरमा पहिचानवादी र प्रहरीबीच झडप भएको छ । कोशी नाम खारेजको माग गर्दै आन्दोलन गर्दै आएका पहिचानवादीहरुले शनिवार विराटनगरमा शव प्रदर्शन गर्ने क्रममा झडप भएको हो । विराटनगरमा गत चैत १० गते मृत्यु भएका पदम लिम्बू लाजेहाङको शव प्रदर्शन गर्ने क्रममा विराटनगरको रोडशेषमा झडप भएको हो । गत चैत ५ गते विराटनगरमा गरेको प्रदर्शनका क्रममा प्रहरी र आन्दोलनकारीबीच झडप भएको थियो । टाउकोमा चोट लागेका लिम्बु चैत ८ गते धरानस्थित विपी कोइराला स्वास्थ्य विज्ञान प्रतिष्ठानमा उपचारका लागि भर्ना भएकामा १० गते उनको मृत्यु भएको थियो । त्यसपछि प्रदेश पुनः नामाकरण संयुक्त संघर्ष समितिले उनलाई सहिद घोषणा गर्नुपर्ने, उचित क्षतिपूर्ति दिनुपर्ने लगायतका माग राख्दै आन्दोलन गर्दै आएका थिए । लाजेहाङलाई संघीय सरकारले सहिद घोषणा गर्ने र उनको परिवारलाई क्षतिपूर्ति दिने निर्णय गरिसकेको भएपनि पहिचानवादीले आज शब सहित प्रदर्शन गरेका थिए । मृतकका परिवारलाई कोशी प्रदेश सरकारले ३ लाख रुपैयाँ क्षतिपूर्ति दिने निर्णय गरिसकेको छ । संघर्ष समितिले भने प्रदेशको नाम कोशी खारेज नगरेसम्म शव उठाउन नदिने बताउँदै आएका थिए । विभिन्न पक्षसँग भएको छलफलपछि आज शब उठाउने र धरान, ईटहरी विराटनगरको परिक्रमा पछि अन्त्येष्टी गर्ने भनिएको थियो । त्यही क्रममा बिराटनगरमाझडप भएको हो । झडपको क्रममा प्रहरीले केही शेल अश्रुग्यास प्रहार गर्नुका साथै हवाई फायर समेत गरेको छ ।
