विराटनगर । विराटनगर तीनपैनीस्थित हाजी इन्जिनियरिङ एण्ड ग्रिल वर्कसपले विराटनगर महानगरपालिकालाई विशेष किसिमको डस्विन प्रदान गरेको छ ।
एक कार्यक्रमका बीच मेयर नागेश कोइरालालाई डस्विन हस्तान्तरण गरेको हो । पहिलो चरणमा महानगरलाई १० थान डस्विन प्रदान गरेको वर्कसपका सञ्चालक मोहम्मद अनवर अन्सारीले बताए । महानगरलाई चार महिनाभित्र १ सय २५ थान डस्विन प्रदान गरिसक्ने उनले प्रतिवद्धता व्यक्त गरे । उनले विराटनगर बनाउने दायित्व सबैको भएकाले आफूले महानगरले जारी राखेको सरसफाई अभियानमा सहयोग पुगोस् भनेर निःशुल्क रुपमा डस्विन प्रदान गरेको जानकारी दिए ।
डस्विन निर्माण गर्दा एउटाको १२ हजार ५ सय परेको छ, उनले भने, यसलाई हामीले विराटनगरको फोहोरमैला ब्यवस्थापनमा प्रयोग गर्ने ठानेर हस्तान्तरण गरिएको हो ।
त्यस्तै कार्यक्रममा मेयर कोइरालाले अनबर जस्तै मनकारीहरुको साथ र सहयोग प्राप्त भए विराटनगर समृद्धि र व्यवस्थित बन्न समय नलाग्ने दाबी गरे । उनले महानगरको एक्लो प्रयासले मात्रै विराटनगरको विकास गर्न नसकिने उल्लेख गरे । विराटनगरलाई सफा, सुन्दर, उज्यालो, व्यवस्थित र विकसित बनाउने अभियान जारी रहेको छ, कोईरालाले भने, अभियान सफल बनाउन सबैलाई सहयोग गर्न आग्रह गर्दछु ।
महानगरको सरसफाई शाखाका प्रमुख पुनम दाहालले प्राप्त डस्विनलाई मुख्य बजार क्षेत्रमा राखिने बताए ।
