इटहरी । धरान तरहरा सडक खण्डको सेउती पुलमा गोली प्रहार गरी एक जनाको हत्या भएको छ । गोली प्रहार घाइते भएका रोहित चौधरीको मृत्यु भएको प्रहरीले जनाएको छ। गोली लागेर गम्भीर घाइते भएका चौधरीलाई उपचारकालागि बिपी प्रतिष्ठान लगिएकोकोमा उपचार हुन नसकेर मृत्यु भएको हो । उनको प्रतिष्ठानको आकस्मिक कक्षमा उपचारको क्रममा मृत्यु भएको प्रहरीले जनाएको छ ।
धनकुटाको मुलघाटबाट विराटनगर आउँदै गरेका विराटनगर ५ का २८ वर्षीय रोहित चौधरीमाथि सडकमा हतियारधारी समूहले आक्रमण गरेको थियो । गोली प्रहार गरी लुटपाट गरिएका चौधरीको साथबाट मोबाइल र पैसा लुटेर समुह फरार भएको प्रहरीले जनाएको छ। तीन जनाको समूहमा आएका लुटेरा मध्ये २ जनासँग खुकुरी र एक जनासँग पेस्तोल रहेको मृतक चौधरीसँगै रहेकी सुमना खत्रीले प्रहरीलाई जानकारी गराएको प्रहरी श्रोतले जनाएको छ। खत्रीको अवस्था सामान्य छ । प्रहरीका अनुसार घटना साँझ साढे ५ तिर भएको हो । उनीहरु मोटरसाइकलमा इटहरीतर्फ आइरहेको बेला यो घटना भएको हो ।
