इटहरी । इटहरीकी गीतकार मिश्रा गुरूङको नयाँ गीत ‘दिलको दरबार’ सांगितिक बजार सार्वजनिक गरिएको छ । लोकलयमा आधारित गीत क्यास म्युजिक युट्युव च्यानल मार्फत सार्वजनिक गरिएको हो ।
गीतमा मेरो भ्वाइस युनिभर्सका फाइनलिस्ट गायक परेश राई, गायिका कुसुम गुरुङले स्वर दिएका छन् । शशी गुरुङ (वाङ्देल)को सङ्गीत रहेको ‘दिलको दरबार’ लाई एरेन्जर राजु कार्की, रेकर्डिस्ट विशाल लिम्बु र मिक्सर–मास्टर सागर संसार राईले माहोल स्टुडियोमा तयार पारिएको हो ।
नौ मिनेट २८ सेकेन्ड लामो सो गीतको म्युजिक भिडियोमा मीन गुरुङ, अनुसा साम्पाङ राई, आशिष लिम्बु, सलिना भुजेललगायत कलाकारको अभिनय एवम् नृत्य प्रस्तुत गरिएको छ ।
भिडियो सम्पादन अर्जुन खड्का, सहायक निर्देशन दिनेश कार्की र कारियोग्राफी तथा निर्देशन अनील थुलुङ राईको रहेको छ । गीतको छायाङ्कन काठमाडौँ, फर्पिङ क्षेत्रमा गरिएको हो ।
राजेश लिम्बुको सहकार्यमा ‘दिलको दरबार’ राष्ट्रिय चाड दसैँको शुभकामना कोसेलीस्वरूप प्रस्तुत गरिएको सगरमाथा साहित्य प्रतिष्ठान कोसी प्रदेश अध्यक्षसमेत रहेकी गीतकार मिश्रा गुरुङले बताइन् ।
यसअघि गीतकार गुरुङको ‘फूलको धारले’ बोलको गजल सरिता राई आङ्बुहाङको स्वर तथा दुर्गा पराजुलीको सङ्गीतमा २०८० साउन २३ गते क्यास म्युजिक च्यानलमार्फत सार्वजनिक गरिएको थियो ।।
