विराटनगर । इटहरी उप महानगरपालिका भित्रका विद्यालयमा अध्ययनरत विद्याथीहरुले एउटै पोसाक लाउनु पर्ने भएको छ । निजी र सामुदायिक विद्यालयका विद्यार्थीबिचको विभेद हटाउन भन्दै इटहरी उपमहानगरपालिकाले सबै विद्यालयमा एउटै पोसाक लागू गर्ने निर्णय गरेको छ । नगरपालिको आगामी नयाँ शैक्षिक सत्रबाट उप महानगर भित्रका सबै विद्यालयमा एकै प्रकारको पोसाक लगाउनु पर्ने निर्णय लिएको हो ।
इटहरीमा १३४ निजी र ३६ सामुदायिक गरी १७० वटा विद्यालय छन् । इटहरीमा ६३ हजार ५ सय २६ विद्यार्थी अध्ययनरत रहेका छन् । इटहरी भित्रका निजी तथा सबै सामुदायिक विद्यालयमा अध्ययनरत विद्यार्थीले एक खालको पोसाक लगाउनुपर्ने गरी नियम बनाएको इटहरी उप महानगरपालिकाले जनाएको छ । इटहरी उपमहानगरका नगर प्रमुख हेमकर्ण पौडेलले विद्यालयमा टाई हटाएर भादगाउँले टोपी लगाउने निर्णय गरेको बताए । उनले भने, निजी स्कुलहरूले ड्रेस पनि बढी मूल्यमा आफ्नै स्कुलबाट बिक्री गर्ने गरेका छन् त्यो रोक्ने हाम्रो अभियान पनि हो मेयर पौडेलले भने ।
