काठमाडौँ — ओली वाट्किन्सले इन्ज्युरी समयमा गरेको उत्कृष्ट गोलमा इंग्ल्यान्डले युरो-२०२४ मा बुधबार नेदरल्यान्ड्सलाई २–१ ले हराएर फाइनल प्रवेश गरेको छ । अब आइतबार हुने उपाधिको भिडन्तमा इंग्ल्यान्डले स्पेनको सामना गर्नेछ ।
इंग्ल्यान्ड प्रतियोगिताको फाइनल पुगेको यो लगातार दोस्रो पल्ट हो । डर्टमन्डमा भएको यसपल्टको दोस्रो सेमिफाइनलमा नेदरल्यान्ड्सले जाभी सिमोन्सको गोलले सातौं मिनेटमै सुरुआती अग्रता लिएको थियो । यो अग्रता लामो समय टिकेन् र इंग्ल्यान्डका लागि ह्यारी केनले पेनाल्टीबाट बराबरी गोल फर्काए ।
केनले १८ औं मिनेटमा गोलपछि खेल बराबरीको स्थितिमा रह्यो र प्रतिस्पर्धा अतिरिक्त समय जाने सम्भावना बढेको थियो । तर वाटकिनसले दोस्रो हाफको इन्ज्युरी समयको पहिलो मिनेट निर्णायक गोल गरे र इंग्ल्यान्डलाई जित दिलाए । अब इंग्ल्यान्डसामु सन् १९६६ यता पहिलो ठूलो उपाधि जित्ने अवसर बन्ने छ ।
