सुनसरी । धनकुटाको चौबिसे गाउँपालिका ५ स्थित वैकुण्ठेबाट प्रहरीले भरुवा बन्दुक सहित एक व्यक्ति पक्राउ गरेको छ ।
पक्राउ पर्नेमा स्थानीय ४५ वर्षीय प्रेमबहादुर जोगी रहेको प्रहरीले जनाएको छ । जोगीलाई बुधवार राति नियन्त्रणमा लिएको इलाका प्रहरी कार्यालय राजा रानीका प्रहरी निरीक्षक उमेश राईले जानकारी दिए ।
मादक पदार्थ सेवन गरेर आफन्तलाई धम्क्याउदै गरेको अवस्थामा इलाका प्रहरी कार्यालय राजारानी र अस्थायी प्रहरी पोष्ट मौनाबुधुकबाट खटिएका प्रहरी टोलीले जोगीलाई नियन्त्रणमा लिएको हो । जोगीको साथबाट भरुवा बन्दुक सहित खुकुरी र चक्कु समेत बरामद गरिएको जनाइएको छ ।
जिल्ला प्रहरी कार्यालयमा झिकाएर थप अनुसन्धान प्रक्रिया अगाडी बढाइने जिल्ला प्रहरी प्रमुख एसपी श्यामसिंह चौधरीले जानकारी दिए ।
