सुनसरी- पूर्वपश्चिम राजमार्गस्थित मोरङको उर्लाबारी ३ नयाँ मङ्गलबारेमा बिहीबार साँझ मोटरसाइकल दुर्घटना हुँदा २ जनाको मृत्यु भएको छ भने अरू २ जना गम्भीर घाइते भएका छन् ।
पथरीबाट उर्लाबारीतर्फ जाँदै गरेको प्र १-०२-०५० प ८४०६ न.को मोटरसाइकल र उर्लाबारीबाट पथरी तर्फ आउँदै गरेको प्र १-०२-०४३ प ९२२६ न.को मोटरसाइकल एक आपसमा ठक्कर खाई दुर्घटना हुँदा ४ जना घाइते भएका थिए । घाइतेमध्ये दुई जनालाई अस्पताल पुर्याउनासाथ चिकित्सकले मृत घोषणा गरेको कोसी प्रदेश टाफिक प्रहरी कार्यालय इटहरीले जानकारी दिएको छ ।
मृतकहरूमा मोरङको पथरीशनिश्चरे नगरपालिका ५ बस्ने अन्दाजी ४०/४२ वर्षको दीपक धिमाल र मोरङ कानेपोखरी ४ रमाइलो बस्ने अन्दाजी २७/२८ वर्षको किशोर गुरुङ रहेको प्रहरीले जनाएको छ । धिमाललाई अरनिको अस्पताल उर्लाबारी र गुरुङलाई मदन भण्डारी अस्पताल तथा ट्रमा सेन्टर मङ्गलबारेले अस्पताल पुर्याउनासाथ मृत घोषणा गरेको प्रहरीले जनाएको छ । दुर्घटनामा गम्भीर घाइते भएका अन्दाजी २५/३० वर्षका अमृत लिम्बु र ४०/४२ वर्षका विष्णु धिमाललाई थप उपचारका लागि बी एन्ड सी अस्पताल बिर्तामोड झापा पठाइएको कोसी प्रदेश टाफिक प्रहरी कार्यालय इटहरीले जनाएको छ । घाइते दुवै जनाको ठेगाना भने खुल्न नसकेको प्रहरीले जनाएको छ । केही बेरअघि भएको दुर्घटनाको थप अनुसन्धान भइरहेको प्रहरीले जनाएको छ ।
