सुनसरी । धरान एक्स्पो २०८१ प्रदेश १ सरकार र धरान उपमहानगरपालिकाको सहयोगमा पौष २५ देखि माघ ५ गतेसम्म धरान रंगशालामा आयोजना हुँदैछ। कृषि, उद्योग, र पर्यटनको प्रवर्द्धन गर्ने लक्ष्यसहित आयोजित यस एक्स्पोले धरानलाई क्षेत्रीय व्यापारिक केन्द्रको रूपमा स्थापित गर्न खोजेको छ। यसै सन्दर्भमा, हामीले एक्स्पोका संयोजक गोपाल श्रेष्ठसँग कुराकानी गरेका छौं।
१. धरान एक्स्पो २०८१ को मुख्य उद्देश्य के हो?
एक्स्पोको मुख्य उद्देश्य स्थानीय कृषि उत्पादन, उद्योग, र पर्यटनको प्रवर्द्धन गर्नु हो। यसले स्थानीय उद्यमीहरूलाई आफ्नो उत्पादन र सेवाहरूलाई प्रदर्शन र विस्तार गर्न प्लेटफर्म प्रदान गर्छ। साथै, यो व्यापारिक मेला धरानको अर्थतन्त्रलाई गतिशील बनाउन र क्षेत्रीय स्तरमा व्यापारिक पुनरुत्थान गर्न महत्वपूर्ण भूमिका खेल्नेछ।
२. यसपटकको एक्स्पोलाई विगतका दुई संस्करणहरूसँग तुलना गर्दा के फरक पाउन सकिन्छ ?
यसपटकको एक्स्पोलाई अझ व्यवस्थित र व्यापारिक बनाउन विशेष ध्यान दिएका छौं। पहिलो र दोस्रो संस्करणहरूमा प्रचार-प्रसार सीमित थियो। अहिले तेस्रो संस्करण भएकाले धेरै मानिसहरू एक्स्पोबारे जानकार छन्। सहभागी व्यवसायहरूको विविधता, मनोरञ्जनका कार्यक्रम, र सस्तो तर गुणस्तरीय किनमेलको व्यवस्थाले यसलाई विशेष बनाउने विश्वास छ।
३. एक्स्पोमा मनोरञ्जन कार्यक्रमहरू कस्ता हुनेछन्, र कस्ता दर्शकलाई आकर्षित गर्ने अपेक्षा छ ?
मनोरञ्जन कार्यक्रमहरूमा स्थानीय र राष्ट्रिय स्तरका चर्चित कलाकारहरूको प्रस्तुति हुनेछ। हरेक साँझ सांगीतिक कार्यक्रम आयोजना गरिनेछ, जसले युवा पुस्ता र परिवारलाई आकर्षित गर्नेछ। साथै, बाल उद्यान, रेटेपिङ, र नावजस्ता खेल सामग्रीले सबै उमेर समूहका दर्शकलाई रमाइलो अनुभव प्रदान गर्नेछ।
४. सस्तो सामानको कुरा गर्दै हुनुहुन्छ, यी वस्तुहरूको गुणस्तर सुनिश्चित गर्न के व्यवस्था गरिएको छ ?
गुणस्तर सुनिश्चित गर्न हामीले फ्याक्ट्रीबाट प्रत्यक्ष रूपमा सामान ल्याउने व्यवस्था गरेका छौं। मध्यस्थता हटाएर उत्पादक र उपभोक्ताबीचको प्रत्यक्ष सम्बन्धले सामानको मूल्य सस्तो बनाउनेछ, र गुणस्तर कायम रहन मद्दत गर्नेछ।
५. एक्स्पोको आर्थिक प्रभाव कस्तो हुने अपेक्षा गरिएको छ धरानको स्थानीय व्यवसायहरूमा ?
एक्स्पोले धरानको सुस्ताएको बजारलाई फेरि सक्रिय बनाउनेछ। आयोजकको अनुमानअनुसार, एक्स्पो अवधिभर १० करोडभन्दा बढीको व्यापार हुनेछ। यसले स्थानीय व्यवसायीलाई नयाँ अवसर प्रदान गर्नेछ, र क्षेत्रीय स्तरको व्यापारिक गतिविधिलाई थप उचाइमा पुर्याउनेछ।
६. आगामी वर्षहरूको लागि एक्स्पोको योजना र रणनीतिहरू के-के छन् ?
हामी एक्स्पोलाई एक राष्ट्रिय स्तरको ब्रान्डको रूपमा स्थापित गर्न चाहन्छौं। आगामी वर्षहरूमा देशभरका व्यापारिक प्रतिनिधिहरूलाई समेट्ने र अन्तर्राष्ट्रिय स्तरका स्टलहरूको सहभागिता बढाउने योजना छ। यसले नेपालका अन्य सहरहरूलाई पनि एक्स्पोको माध्यमबाट समृद्ध बनाउन सहयोग गर्नेछ।
७. धरान एक्स्पोलाई राष्ट्रिय स्तरमा ब्रान्ड बनाउन के-कस्ता कदम चाल्नुभएको छ ?
हामीले राष्ट्रिय स्तरका संघसंस्था र सरकारी निकायहरूसँग सहकार्य गर्दै प्रचार-प्रसारलाई प्राथमिकता दिएका छौं। डिजिटल मिडिया, प्रिन्ट मिडिया, र स्थानीय संजालहरूलाई प्रयोग गरेर एक्स्पोको पहुँच बढाइएको छ। साथै, सहभागी व्यवसायहरूलाई सहजता प्रदान गर्न विशेष प्राविधिक सहयोग उपलब्ध गराइएको छ।
८. अन्तिममा एक्स्पोमा आउने अवलोकनकर्ताहरूलाई तपाईं के सन्देश छोड्न चाहनुहुन्छ?
धरान एक्स्पो केवल किनमेल र मनोरञ्जनको लागि होइन, यो स्थानीय व्यापारलाई अघि बढाउने महत्वपूर्ण अभियान हो। हामी सबैलाई यस अभियानमा सहभागी भई सफल बनाउन आग्रह गर्दछौं। धरानको पहिचानलाई व्यापारिक र पर्यटनको केन्द्रको रूपमा स्थापित गर्न तपाईंहरूको साथ महत्वपूर्ण छ।
