विराटनगर । प्रदेश खबरले समाजमा महत्वपूर्ण योगदान पुर्याउने विशिष्ठ व्यक्तिहरुलाई कोशी एक्सिलेन्स अवार्ड प्रदान गरेको छ ।
स्थापनाको तेस्रो बर्ष प्रवेश गरेको अवसरमा प्रदेश खबरले कोशी प्रदेशमा जन्मिएर विभिन्न विधा महत्वपूर्ण योगदान गर्ने व्यक्तिहरूलाई अवार्डले सम्मानीत गरेको हो ।
विभिन्न १३ विधाका उत्कृष्ट व्यक्तिहरुमा शिक्षा विधातर्फ प्रा.डा. टंकप्रसाद न्यौपाने, स्वास्थ्य तर्फ डा. ज्ञानेन्द्रमान सिंह कार्की, पत्रकारितातर्फ विष्णु निष्ठुुरी, साहित्य तर्फ झमक घिमिरे, सामाजिक विधामा गीता गौतमलाई कोशी एक्सिलेन्स अवार्डद्धारा सम्मानीत गरियो ।
यस्तै, कृषि तथा महिला उद्यम विधाबाट शान्ता बास्कोटा, खेलकुद तर्फ दिलीप राई, बैंकिङ तर्फ ज्ञानेन्द्रप्रसाद ढुंगाना, पर्यटन तर्फ भविष श्रेष्ठ, सूचना तथा प्रविधि तर्फ राजन लम्साल, कर्पोरेट विधाबाट महेश जाजु, युवा उद्यम विधाबाट पारस लुनियाँ र स्टार्टअप विधामा आयुष भगतलाई अवार्ड प्रदान गरिएको हो ।
उनीहरूलाई कार्यक्रमका प्रमुख अतिथि कोशी प्रदेश सरकारका मुख्यमन्त्री हिक्मत कुमार कार्कीले अवार्ड प्रदान गरे ।
यसैगरी वार्षिकोत्सवको अवसरमा १२ जनालाई सम्मान गरिएको छ । सम्मानित हुनेमा नेपाल राष्ट्र बैँकका गभर्नर महाप्रसाद अधिकारी, नेपाल सरकारका प्रथम महिला मुख्यसचिव लीलादेवी गड्तौला, श्रमजिवी नेपाल यातायात स्वतन्त्र मजदुर संगठन अध्यक्ष भीम राई ज्वाला रहेका छन् ।
यस्तै, इलाम नगरपालिकाकी उपप्रमुख विष्णुकमारी लिम्बू (दहाल), अग्रज पत्रकार गोविन्द चन्द्र क्षेत्री, शिक्षासेवी चन्द्र भण्डारी, टाइम्स पब्लिकेशनका पुरुषोत्तम दाहाल, नेपालमा सबैभन्दा अग्ला व्यक्तिका रूपमा परिचय स्थापित गराउने राजन अधिकारी र पर्यटन व्यावसायी सुनील भुसाल रहेका छन् ।
यस्तै, संस्थाहरू कामधेनु दूग्ध विकास सहकारी संस्था लिमिटेड, माया घर नेपाल र नव दृष्टि आँखा अस्पताललाई सम्मान गरिएको हो ।
अनलाइन पोर्टल प्रदेश खबर नयन एड्भरटाइजिङ मिडिया प्रालिद्दारा सञ्चालित हुँदै आएको छ ।
अवार्ड प्राप्त गर्ने तथा सम्मानीत व्यक्तिहरुको छनौटका लागि एक छुट्टै समिति बनाएर छनौट गरिएको नयन एड्भरटाइजिङ मिडिया प्रा.लिका अध्यक्ष पवन अधिकारीले जानकारी दिए ।
निर्णयक समिति मार्फत छनौट भएका व्यक्तित्वहरुलाई कम्पनीले अवार्ड तथा सम्मान गरिएको अध्यक्ष अधिकारीले जानकारी दिए ।
कार्यक्रममा कोशी प्रदेश मुख्यमन्त्री हिक्मतकुमार कार्की, आन्तरिक मामिला तथा कानुन मन्त्री रेवतीरमण भण्डारी, पर्यटन वन तथा वातावरण मन्त्री सदानन्द मण्डल, नेपाली कांग्रेस केन्द्रीय सदस्य राजीव ढुंगाना, नेपाल पत्रकार महासंघका महासचिव रामप्रसाद दाहाल, महासंघ कोशीका अध्यक्ष भरत खड्कालगायतले सम्बोधन गरेका थिए ।
