सुनसरी । बजेट अभावले हुलाकी राजमार्गको पूर्वी खण्डमा पर्ने पुल निर्माणको काम ठप्प भएको छ ।
तराइका भित्री बस्तीहरूमा यातायातको पहुँच पुर्‍याएर गाउँवस्तीको मुहार फेर्न निर्माण सुरु गरिएको राजमार्गमा निर्माणाधीन पुलले गति लिन नसक्दा सडक पुर्णरुपमा सञ्चालनमा आउन सकेको छैन । हुलाकी सडक सञ्चालनमा आए झापाको मेची पुलबाट ९२ किलोमिटरमा कोसी प्रदेशको राजधानी विराटनगर पुगिन्छ । तर उक्त खण्डमा निर्माणाधीन पाँच वटा पुलका निर्माण कार्य लामो समयसम्म पुरा नहुँदा यातायात सञ्चालन हुन सकेको छैन । हुलाकी राजमार्ग अन्तर्गत पर्ने कन्काई नदीको निर्माणाधीन पुल बनाउन सुरु गरिएको १३ वर्ष बितिसकेको छ ।
नौ बर्षअघिनै बनी सक्नुपर्ने पुलको अहिलेसम्म ५५ प्रतिशत मात्र काम भएको छ । हुलाकी राजमार्गको मेची पुलदेखि विराटनगर सम्म ९२ किलोमिटरको बिचमा पर्ने कन्काई लगायत पाँच वटा पुल बन्न बाँकी छन् । यी पुलहरु लामो समयसम्म निर्माण सम्पन्न नहुँदा सर्वसाधारणलाई आवतजावत गर्न कठिनाइ भएको छ । बजेट अभावले निर्माण चरणको अन्तिम समयमा आएर अधिकांश पुलको काम प्रभावित भएको हुलाकी राजमार्ग योजना कार्यालय इटहरीका सूचना अधिकारी उपेन्द्र दासले जानकारी दिए ।
हुलाकी राजमार्ग अन्तर्गत मेची–रतुवा सडक खण्डमा पर्ने भुतनी खोलाको पुल निर्माण सुरु भएको आठ वर्ष भइसक्दा पनि काम सकिएको छैन । उक्त पुलको भौतिक प्रगति ८ वर्षमा ९० प्रतिशत मात्र छ । सोही खण्डमा पर्ने बिरिङ पुलको निर्माण कार्य समेत अन्तिम समयमा आएर रोकिएको छ । लामा मैनाचुली जेभीले ठेक्का पाएको उक्त सडक निर्माण सुरु भएको १२ वर्षमा ९५ प्रतिशत मात्र काम सम्पन्न भएको छ ।
सानो माई खोला पुलको अवस्था पनि उस्तै छ । लामा बाम्ती जेभीले नै ठेक्का पाएको मेची–रतुवा खण्डको लेहेरा खोला पुल समेत अलपत्र छ । ४ करोड ६४ लाख ४१ हजार १ सय ६० रुपैयाँमा ठेक्का लागेको सो पुल २०७३ असारमा निर्माण सुरु भएर २०७५ असारमा सम्पन्न भैसक्नुपर्नेमा अहिलेसम्म ९० प्रतिशत मात्र काम सकिएको आयोजना कार्यालय इटहरीले जनाएको छ ।