विराटनगर । किसानलाई कृषिमा आत्मनिर्भर बनाउन भोजपुरको पौवादुङमा गाउँपालिकाले ५१ लाख बराबरको कृषि सामाग्री वितरण गरेको छ ।
गाउँपालिकाका सात सय ५० किसानलाई कृषि सामग्री वितरण गरेको गाउँपालिकाले जानकारी दिएको छ । किसानको मागको आधारमा कृषि सामाग्री वितरण गरिएको पौवादुङ्मा गाउँपालिकाका प्रमुख प्रशासकीय अधिकृत नवीन भट्टराईले जानकारी दिए ।
किसानलाई व्यावसायिक अकबरे खुर्सानीखेतीको लागि मल्चिङ प्लाष्टिक, प्लाष्टिक टनेल, हातेट्र्याक्टर, प्लाष्टिक पोखरी, स्प्रे गरी रु ५१ लाख बराबरको कृषि सामग्री हस्तान्तरण गरिएको प्रशासकीय अधिकृत भट्टराईले बताए । उनका अनुसार यो बर्ष ७० लाख बराबरको कृषि सामाग्री वितरण गर्ने योजना रहेको छ ।
यी सामाग्रीहरु गाउँपालिकाले ५० प्रतिशत अनुदानका आधारमा वितरण गरेको प्रमुख प्रशासकीय अधिकृत भट्टराईले जानकारी दिए ।
एक हजार पाँच सय रोल मल्चिङ प्लाष्टिक, सात सय वटा टनेल प्लाष्टिक, ७८ वटा इलेक्ट्रिक स्पेरियर, १५ वटा हाते ट्र्याक्टर वितरण गरिने भट्टराईको जानकारी दिए ।
यहाँको भूगोलअनुसार पकेट क्षेत्र निर्धारण गरेर कृषिमा योजनाबद्ध रुपमा लगानी गरिरहेको गाउँपालिकाले जनाएको छ । कृषिमा नमूना बनाउने लक्ष्यका साथ लगानी गरिरहेको गाउँपालिका अध्यक्ष किरण राईले बताएका छन् । यहाँको उत्पादित कृषिउपजको बजारीकरणमा गाउँपालिकाले भूमिका खेल्ने अध्यक्ष राईको भनाइ छ ।
