सुनसरी । इटहरी उपमहानगरपालिकाको मुख्य चोकमा रहेको व्यापारिक कम्प्लेक्स सेन्ट्रल प्लाजामा बुधवार बिहान भएको आगलागी भयो । १० तल्ले भवनको पाँचौँ तलामा बिहान साढे ९ बजेबाट सुरु भएको आगलागी नियन्त्रणमा लिन सुरक्षाकर्मीलाई ६ घण्टाभन्दा बढी लाग्यो । साढे ३ सयभन्दा बढी जनशक्ति र १६ वटाभन्दा बढी दमकल भेला पारेर गरेको प्रयास गरिए पनि आगलागी नियन्त्रणमा आउन लामो समय लाग्यो । इटहरीको यो घटनाले बहु तल्ले अग्ला–ठुला भवनमा आगलागी हुँदा त्यसलाई कसरी उद्धार र नियन्त्रणमा आउने काम कठिनाइबारे ठुलो पाठ सिकाएको छ ।
१० तल्लाको यो व्यापारिक कम्प्लेक्सको पाँचौँ तल्लामा सिनेमा हल र उक्त व्यापारिक भवनको कार्यालय रहेको छ । आगलागी सुरु हुँदा यहाँ कार्यालयमा केही कर्मचारी र सेवाग्राही थिए । उनीहरूलाई उद्धार गरिएको थियो । यहाँ अन्डरग्राउन्ड पार्किङदेखि होटेल, सिनेमा हल, बैङ्क, सुपर मार्केट, कपडाका पसल, मोबाइल तथा इलेकट्रोनिक्स ठुला पसलहरू छन् । कार्यालय समय सुरु हुनु केहीअघि आगलागी भएको तथा उक्त समयमा सिनेमा हल चालु नभएकाले मानवीय क्षति भने हुन नपाएको सेन्टर प्लाजा स्थित ई मार्टका सञ्चालक सुमित अधिकारीले जानकारी दिए ।
आगलागी नियन्त्रणमा लिनेक्रममा पाँच सुरक्षाकर्मीसहित सात जना घाइते भए । उक्त भवनमा फसेका ११ जना सर्वसाधारणको सकुशल उद्धार भयो । उद्धारका लागि काठमाण्डौबाट नेपाली सेनाको हेलिकप्टर मगाएर परिचालित गरियो । निक्कै ढिला गरी आइपुगेको क्रेनको सहायताले पानी हालियो । आयल निगमबाट लगेको फोम पनि प्रयोग भयो । तर पनि आगलागी नियन्त्रणमा लिन निक्कै समय खर्चनुपर्यो । इटहरी उपमहानगरसँग अग्ला घरमा आगो लागे निभाउने र फसेका मान्छे उद्धार गर्ने जनशक्ति नभएकाले बढी समय लागेको इटहरी उपमहानगरपालिकाका प्रवक्ता दिवस पोखरेलले बताए ।
इटहरीमा भएको आगलागीको यो घटनाले परम्परागत दमकलले मात्रै अग्ला भवनमा आगो निभाउन नसकिने देखाएको छ । यस्तै आगलागीको लागि पूर्व तयारी र अभ्यास तथा दक्ष जनशक्ति अभाव देखाएको उद्धारमा खटिएका एक सुरक्षा अधिकारीको भनाई छ । इटहरीको यो आगलागी घटनाले अग्ला भवनमा आगो निभाउने उपकरणको आवश्यकता खड्काएको मात्र छैन अग्ला भवनमा कसरी आगो निभाउने र कस्ता प्रविधि अपनाउने भन्ने पाठ सिकाएको छ ।
