इटहरी । गत पुष १६ गते इटहरी उप महानगरपालिकाको गेट अगाडि बम राखेको भन्दै अफवाह फैलाउने २ जना पक्राउ परेका छन् । प्रहरीको बिषेश टोलीले उनीहरुलाई पक्राउ गरेको हो । पक्राउ पर्नेमा झापाको कनकलाई नगरपालिका– ८ का ४६ वर्षीय सञ्जय भनिने खगेन्द्र खरेल र लक्ष्मीदेवी थापा छन् ।
इटहरीमा बम राखेको हल्ला फिजाएर भारतमा लुकीछिपी बसेका खरेल र थापालाई भारतमा लुकिछिपी बसेको अवस्थामा प्रहरीले केही दिन अघि पक्राउ गरेको हो । भारतबाट पक्राउ गरेर बुधवार राती मात्र सुनसरी भान्टाबारी नाकाबाट नेपाल ल्याइएको प्रहरीले जनाएको छ । पक्राउ परेका खरेलले पुष १६ गते इटहरी उप महानगरको गेट अगाडि र सुनसरी र मोरङ्ग जोड्ने बुढीखोलाको पुलमा बम राखेको हल्ला फिजाएका थिए ।
प्रहरीका अनुसार खरेलले नै विस्फोटक पदार्थ राखेको भन्दै प्रहरीलाइ म्यासेज मार्फत खबर गरेका थिए । म्यासेज आएपछि प्रहरी पुग्दा शङ्कास्पद वस्तु फेला परेको थियो । शंकास्पद वस्तु निश्क्रीय गर्न पुगेको नेपाली सेनाको टोलीले यी दुवै स्थानमा राखिएका वस्तु बम नभएको पत्ता लगाएको थियो । बम भनेर हल्ला फिजाँएको आरोपमा अरोपमा प्रहरीको अनुसन्धन व्यूरोले दुई जनालाई पक्राउ गरेको हो । प्रहरीले खरेल र थापा सुनसरी र झापामा पटक पटक विस्फोट पदार्थ राख्ने र हल्ला फिजाँउने कार्यमा संलग्न रहेको प्रदेश प्रहरी कार्यालय कोशीका वरिष्ठ प्रहरी उपरिक्षक भिम दाहालले बताए ।
दाहालका अनुसार पुस १६ गते भने खरेलले म्यासेज मार्फत बम राखेको भनेर प्रहरीलाई नै खबर गरेका थिए । खबर पछि प्रहरीको टोली इटहरी उप महानगरपालिका र बुढी खोला पुग्दा शङ्कास्पद वस्तु फेला परेको थियो । यसरी फेला परेका शङ्कास्पद वस्तु बम नभई आतङ्क सिर्जना गर्न लाई बनाइएको सामाग्री रहेको पुष्टि भएको थियो ।
यी दुई स्थानमा बम राखेको सुचना दिएर खरेल भागेर भारत पुगेका थिए । प्रदेश प्रहरी कार्यालय कोशीका बरिष्ठ प्रहरी उपरिक्षक दाहालले घटनामा संलग्न रहेको आरोपमा प्रहरीले उनीहरुलाई पक्राउ गरिएको बताए । उनले भने, ‘उनीहरुलाई प्रहरीले पक्राउ गरेर ल्याएको छ ।’
खरेल२०७६ वैशाख २८ गते गोर्खा जनमुक्ति पार्टीको नाममा झापाको कनकाई नदी पुलमा बम राखेको आरोपमा पक्राउ परेका थिए । २ वर्ष पाँच महिना कैदपछि झापा कारागारबाट उनी छुटेका थिए ।
२०७८ माघ माघ ९ गते बिर्तामोडस्थित पश्चिम बस बिसौनी र माघ १३ गते दमकस्थित सिवान चर्चमा हिमाल सुरक्षा परिषद्को पर्चासहित प्रेसरकुकर बम राखेको घटनामा उनी पक्राउ परेका थिए । बम राखेर जनजीवन त्रसित पार्ने कार्यमा उनीहरुकै संलग्नता देखिएपछि जिल्ला प्रहरी कार्यालयले उनीहरुलाई पक्राउ गरेको थियो ।
जेलबाट छुटे लगत्तै खगेन्द्रले विभिन्न नक्कली फेसबुक आइडी र ग्रुपको निर्माण गरेर संवैधानिक राजतन्त्र, हिन्दू राष्ट्र, एमसिसी खारेजको माग राख्दै प्रचार सामाग्री बनाएर प्रचार गरेका थिए । यसपछि उनले हिमाल सुरक्षा परिषद् नामक पार्टी नामकरण गरेर बम राखेको हल्ला फिजाँउदै आएका थिए ।
हिमाल सुरक्षा परिषदका नाममा उनले २०७८ चैत १४ इटहरी उपमहानगर– २ स्थित नवजागृति टोलको एक घरमा सुतली बम विस्फोट गराएका थिए ।
सो घटनामा खरेल पुन पक्राउ परेका थिए । सुतली बम विस्फोटको घटनामा अहिले पक्राउ परेकी थापाको पनि संलग्नता देखिएको थियो । थापाकै घरमा राखेको सुतली बम विस्फोट हुँदा रविन थापा र लमजुङका शेरजङ गुरुङ घाइते भएका थिए । यो घटनामा इटहरी प्रहरीले खरेल सहित ४ जनालाई पक्राउ गरी कारागार चलान गरेको थियो ।
कारागारबाट छुटेपछि खरेल आफैले पुस १६ गते इटहरी उपमहानगरपालिका अगाडी र बुढी खोला पुल नजिक बम राखेको भन्दै अफवाह फैलाएका थिए । पक्राउ परेका खरेल र थापासँग थप अनुसन्धान भइरहेको दाहालले बताए ।
