विराटनगर । युवतीको कोठामा श्रीमान् गएको थाहा पाएपछि साथीहरू लिएर पुगेकी श्रीमतीको कुटपिटबाट झापाको अर्जुनधारामा एक जना महिलाको मृत्यु भएको छ । स्थानीय रमेश भुसालकी श्रीमती र उनका साथीहरूको कुटपिटबाट अर्जुनधारा नगरपालिका वडा नम्बर ४ का रमेश भुसालकी केटी साथी गङ्गा राईको मृत्यु भएको प्रहरीले जनाएको छ ।
भुसाल गए राती ११ गङ्गा राईको कोठामा गएका थिए । राइकै कोठामा गएर भुसालकी सुस्मिता भुसालले साथीहरू सहित गएर गङ्गा माथि आक्रमण गरेकी थिइन् । आफ्ना पति रमेश भुसाल गङ्गाको कोठामा गएको थाहा पाएपछि टोलका केही महिलाहरूलाई बोलाएर गङ्गा माथि आक्रमण गरेको प्रहरीको प्रारम्भिक अनुसन्धानबाट खुलेको छ ।
प्रहरीका अनुसार सुस्मिताले ५४ वर्षीय मैयाँ श्रेष्ठ, ३८ वर्षीय बबिता विक, २४ वर्षीय मेनुका पाँचकोटी र ६० वर्षीय नबर्दा सुनदासलाई लिएर गई राई लाई कुटपिट गरेको पाइएको छ । सामूहिक रूपमा कुटपिटबाट गङ्गा गम्भीर घाइते भएकी थिइन् ।
घाइते गङ्गालाई सुरुमा शनिश्चरे स्थित शङ्कर अस्पतालमा लगिएको थियो। त्यहाँ सामान्य उपचारपछि थप उपचारका लागि बिर्तामोडको बिर्तासीटी अस्पताल लगिएको थियो । तर, उपचारकै क्रममा बुधवार बिहानका राति १ः२० बजेतिर उनको मृत्यु भएको बिर्तामोड प्रहरीले जनाएको छ ।
प्रहरीका अनुसार घटनापछि सुस्मिता भुसालसहित कुटपिटमा संलग्न रहेका ५ महिला र सुस्मिताका पति रमेश भुसाललाई नियन्त्रणमा लिइएको छ। घटनाका विषयमा थप अनुसन्धान भइरहेको प्रहरीले जनाएको छ ।
